काठमाडौं । नेपालले सहभागिता जनाउने आईसीसी पुरुष टी-ट्वान्टी विश्वकपको एसिया छनोट 'बी' प्रतियोगिता स्थगित भएको छ ।
विश्वभर महामारीको रुपमा फैलिएको कोरोना भाईरसको कारण नेपालले खेल्ने एसिया छनोट स्थगित भएको हो ।
अन्तर्राष्ट्रिय क्रिकेट परिषद (आईसीसी) ले बुधबार एक विज्ञप्ति निकाल्दै आगामी जुन २६ देखी जुलाई २ सम्म मलेसियामा हुने छनोट अनिश्चित कालका लागि स्थगित भएको जनाएको छ ।
प्रतियोगितामा आयोजक मलेसियासहित नेपाल, भुटान, चीन, म्यानमार र थाइल्याण्ड रहेका थिए ।
यस्तै आईसीसीले कोरोनाको कारण देखाउदै आगामी जुन ३० अघि सार्वजनिक भएका सबै प्रतियोगिता स्थगित भएको समेत जनाएको छ ।
आईसीसीको निर्णयसँगै नेपालले खेल्ने आईसीसी क्रिकेट विश्वकप लिग–२ अन्तर्गतको दुई सिरिज समेत स्थगित भएको छ ।
नेपालले नामिबियामा र पपुपा न्युगिनीमा खेल्ने दुई फरक त्रिकोणात्मक सिरिज स्थगित भएको हो ।
नामिबियामा हुने सिरिजमा नेपालसहित घरेलु टोली नामिबिया र स्कटल्याण्डले प्रतिस्पर्धा गर्ने तय थियाे ।
सातौं चरणको खेल अप्रिल २० देखि २७ सम्म नामिबियामा हुने तालिकामा उल्लेख थियाे ।
आईसीसीले सातौं चरणको लिग सेप्टेम्बरमा हुने बताएको छ । तर, मिति भने केही समय पछिनै घोषणा हुनेछ ।
यस्तै पपुपा न्युगिनीमा हुने नेपाल, पपुवा न्युगिनी र युएईबीचको सिरिज ९ देखि १६ जुनसम्म हुने तालिका रहेको थियो ।
लिग–२ प्रतियोगिता सन् २०२३ विश्वकप छनोट प्रतियोगितामा पुग्ने सुनौलो अवसर हो । जहाँ ७ राष्ट्रले ३४ एकदिवसीय अन्तराष्ट्रिय म्याच खेल्ने गर्छन् ।
तालिकाको शीर्ष तीन टिमले सिधै विश्वकप छनोट खेल्न पाउने छन् ।
नेपालले एक सिरिजमा ४ खेल खेल्दै २ मा जित र २ मा हार ब्यहोरेको छ ।
-1735651318.jpg)
