एजेन्सी । जिम्बावेविरुद्धको दुई खेलको टी-ट्वान्टी अन्तर्राष्ट्रिय क्रिकेट सिरिज बंगलादेशले क्लिन स्विप गरेको छ ।
ढाकामा बुधबार भएको दोस्रो तथा अन्तिम खेलमा ९ विकेटको जित निकाल्दै बंगलादेशले सिरिज २-० ले जितेको हो ।
यस अघि सोमबार भएको खेलमा बंगलादेशले जिम्बावेलाई ४८ रनले हराएको थियो ।
जिम्बावेले दिएको १ सय २० रनको लक्ष्य बंगलादेशले १५ ओभर ५ बलमा मात्र १ विकेट गुमाएर पुरा गर्यो ।
बंगलादेशको जितमा लिटोन दासले अविजित ६० रनको अर्धशतकीय इनिङ्स खेल्दा मोहमद नाइँमले ३३ रन बनाए । सौम्य सरकार २० रनमा अविजित रहे । जिम्बावेका क्रिस एमपुफुले १ विकेट लिए ।
यस अघि टस हारेर पहिले ब्याटिङ गरेको जिम्बावेले २० ओभरमा ७ विकेट गुमाएर १ सय १९ रन बनाएको थियो । जिम्बावेका लागि ब्रेण्डन टेलरले ५९ रनको अर्धशतकीय इनिङ्स खेले । क्रेइग इर्भिनेले २९ रन बनाए । बंगलादेशका अल-अमिन हुसेन र मुस्ताफिजुर रहमानले २/२ विकेट लिए ।
