झापा-११ माईभ्याली गोल्डकपबाट बाहिरियो 

इलाम । दुई पटकको विजेता झापा-११ इलाममा जारी छैटौं संस्करणको माईभ्याली गोल्डकप फुटबलको क्वाटरफाइनलबाटै बाहिरिएको छ ।

इलामको टुँडिखेलमा शनिबार मानेभञ्ज्याङ एफसी दार्जिलिङसँग २-१ गोल अन्तरले पराजित हुँदै झापा बाहिरिएको हो ।

प्रतिस्पर्धात्मक बनेको खेलको २३ औं मिनेटमा पिनीसाई लिथोङले गोल गर्दै दार्जिलिङलाई सुरुवाती अग्रता दिलाएका थिए ।

खेलको ४८ औं मिनेटमा पिनीसाईले व्यक्तिगत दोस्रो गोल गर्दै दार्जिलिङको अग्रता २-० को बनाए । त्यसपछि खेलको ८५ औं मिनेटमा झापाका सरोज कार्कीले एक गोल फर्काएपनि झापाले दोस्रो चरणमा स्थान बनाउन सकेन ।

अब दार्जिलिङले सेमिफाइनलमा गोर्खा ब्वाईज रुपन्देही र मच्छिन्द्र फूटबल क्लबबीचको विजेतासँग खेलेंछ ।

प्रतियोगितामा आइतबार 'ए' डिभिजन लिग उपविजेता त्रिभुवन आर्मी क्लब र संकटा क्लबीच प्रतिस्पर्धा हुनेछ ।

१० टिम सहभागी प्रतियोगिताको विजेताले नगद ८ लाख तथा उपविजेताले ५ लाख रुपैयाँ पाउने छन् । प्रतियोगिताको उत्कृष्ट खेलाडीले नगद १ लाख २५ हजार प्राप्त गर्ने छन् ।