स्थगित मनाङ र एनआरटीको खेल आज

काठमाडौं । शनिबार स्थगित बनेको मनाङ मरस्याङ्दी र न्युरोड टिम (एनआरटी) आज (आईतबार) हुदैछ ।

खेल ललितपुरको सातदोबाटोस्थित एन्फा कम्प्लेक्समा दिउँसो १ बजे राखिएको छ । खराब मैदानका कारण शनिबार एपीएफको हल्चोक मैदानमा तय खेल अन्तिम समयमा सारिएको थियो ।

एन्फाले प्राविधिक कारणले सरेको खेल आईतबार दिउँसो १ बजे एन्फा कम्प्लेक्समै गर्ने निर्णय गर्दै लिगको नयाँ खेल तालिका सार्वजनीक गरेको थियो ।

अन्तिम खेलमा च्यासलसँग पराजित भएको मनाङले आफुलाई उपाधि होडबाट बाहिर राखिसकेको छ । च्यासलसँगको एक मात्रै हारले मनाङ उपाधि होडबाट बाहिर भएको हो ।

लिगको ११ औं चरणमा मनाङले न्युरोड टिम एनआरटीको सामना गर्दैछ ।

उपाधि होडबाट बाहिरिसकेको मनाङ एनआरटीलाई पराजित गर्दै दोस्रो स्थानको लागि खेल्नेछ । लिगको छैठौ जितले मनाङ पुनः तेस्रो स्थानमा उक्लने छ ।

“अन्तिम खेलको हारले उपाधि गाह्रो छ । अब, शीर्ष ६ मा राम्रो गर्न लाग्छौं ।” मनाङका प्रशिक्षक धनेश्वर प्रजापति भन्छन् ।

राष्ट्रिय टिमका पुर्व सदस्य कमल श्रेष्ठको कप्तानीमा रहेको मनाङले एनआरटीविरुद्ध स्ट्राइकर रन्जन बिष्टलाई गुमाउने छ । उनी दोहोरो पहेलो कार्डका कारण टिम बाहिर हुनेछन् ।

मनाङले अन्जन विष्ट सहित ४ विदेशी खेलाडीलाई प्रयोग गर्न पाउनेछ ।

यता, एनआरटी पनि मनाङलाई पराजित गर्दै शीर्ष ६ मा आफुलाई बलियो बनाउन चाहन्छ । लिगको छैठौ जितले एनआरटीको शीर्ष ६ मा अट्ने सम्भावना बलियो बन्नेछ ।

“मनाङ पहिलेको जस्तो बलियो छैन । तर नामले पनि राम्रो गरिरहेको छ । अन्तिम खेलको हारले केहि दबाब छ तर पनि राम्रो गर्न लाग्छौँ ।” एनआरटीका प्रशिक्षक राजु काजी शाक्य भन्छन् ।

उनी टिमको लक्ष्य शीर्ष ६ रहेको उल्लेख गर्दै त्यसमै ध्यान केन्द्रित गर्न लाग्ने बताउँछन् ।

नियमित कप्तान प्रकाश बुढाथोकी चोटका कारण बाहिर रहँदा पुलिसका पुर्व कप्तान बिक्रम धिमालले टिमको नेतृत्व गर्दै आएका छन् ।

पुर्व क्लब मनाङविरुद्ध प्रकाश उत्रने सम्भावना रहेको छ । मनाङविरुद्ध एनआरटीलाई ४ विदेशी खेलाडी प्रयोग गर्न उपलब्ध हुनेछन् ।