काठमाडौं । विश्वकप छनोटको रुपमा रहेको आईसीसी विश्वकप क्रिकेट लिग-२ को दोस्रो खेलमा नेपालले आज (शनिबार) अमेरिकासँग खेल्दैछ ।
त्रिवि क्रिकेट मैदानमा नेपाल र अमेरिकाबीचको खेल बिहान साढे ९ बजे सुरु हुनेछ ।
नेपाल र अमेरिका त्रिकोणात्मक सिरिजमा पहिलो जितको खोजीमा मैदान उत्रने छन् ।
नेपाल र अमेरिका पहिलो खेलमा ओमानसँग पराजित भएका थिए । पहिलो खेलमा नेपाल ओमानसँग १८ रनले पराजित भएको थियो भने अमेरिकालाई ओमानले ६ विकेटले पराजित गरेको थियो ।
लिगको अन्तर्गत अमेरिका शीर्ष स्थानमा रहेको छ । उसले ९ खेलमा ६ जित हात पार्दै १२ अंकका साथ नेट रन रेटमा ओमानलाई पछि पारेको छ ।
नेपाल भने एक खेल खेल्दा अंक विहीन रहदै तालिकाको पुछारबाट दोस्रो स्थानमा रहेको छ । त्यसैले अमेरिकाविरुद्ध नेपाल पहिलो अंकको खोजीमा मैदान उत्रने छ ।
सुवासलाई मौका
भरपर्दा ब्याट्सम्यान शरद भेषवाकर घाइते भएपछि वैकल्पिक खेलाडी सुवासलाई टिममा बोलाइएको छ । सुवास ओपनिङ ब्याटिङ गर्न रुचाउने विकेटकिपर हुन् ।
नेपालको सधैको समस्या ओपनिङ ब्याटिङ हो । ओमानसँगको खेलमा नेपालले ज्ञानेन्द्र मल्ल र पारस खड्काको जोडी प्रशिक्षण गरेपनि दुवै खेलाडी असफल भएका थिए । त्यसैले अब ज्ञानेन्द्रलाई साथ दिन सुवास ओपानिङमा आउने बलियो सम्भावना रहेको छ ।
यसअघिको भेटमा सुवासले अमेरिकाविरुद्ध ५ खेलमा १ शतक सहित २ सय ३५ रन बनाएका छन् । अमेरिकाविरुद्ध सुवासको औषत ७८ दशमलब ३३ को रहेको छ । जुन नेपाली ब्याट्सम्यान सबै भन्दा धेरै औषत हो ।
यस्तै सुवास अमेरिकाविरुद्ध शतक प्रहार गर्ने पहिलो र एक्लो नेपाली खेलाडी हुन् ।
घरेलु समर्थकको साथ
अमेरिकाविरुद्ध मैदान उत्रँदा नेपाललाई घरेलु मैदान र समर्थकको राम्रो साथ मिल्नेछ । नेपालले अमेरिकासँग घरेलु मैदान र समर्थको फाइदा उठाउन चाहान्छ ।
यता अमेरिकालाई भने ठुलो समर्थकमाझ खेल्ने बानी छैन । उसले खेलेको घरेलु मैदानको खेलमा समेत बिरलै समर्थक देखिने गर्छ । अन्तिम पटक (सन् २०१०) नेपाल भ्रमण आउँदाको अमेरिकी टिममा धेरै खेलाडी नयाँ छन् ।
अमेरिकाका रष्टि थोरनले आईपीएल र बिग बासमा क्याम्रन स्टेभिन्सनले बाहेक अन्य खेलाडीले ठुलो क्राउडमा खेलेका छैनन् ।
उत्साहित अमेरिका
ठुलो समर्थक सामु प्राय खेलाडीलाई अनुभब नभएको कारण नेपालसँग खेल्न उत्साहित रहेको अमेरिकाका प्रशिक्षक जेम्स पम्मेन्ट तथा कप्तान सौरभ नेत्रभालकर बताउँछन् ।
समर्थकको दबाब चिर्न अमेरिकाका प्रशिक्षकले आफ्ना खेलाडीलाई मैदान भित्र मात्र ध्यान दिन सिकाउने बताएका छन् ।
'खेलाडीहरु यति ठुल समर्थकमाझ खेल्न उत्साहित छन् । मैदान बाहिर भन्दा रिङ (बाउन्ड्री लाईन) भित्र खेल्न सिकाउने मेरो काम हो,' प्रशिक्षक जेम्सले भने, 'रष्टि थोरनले आईपीएल र बिग बासमा क्याम्रन स्टेभिन्सनले बाहेक अन्य खेलाडीले ठुलो क्राउडमा खेलेका छैनन् । उनीहरुलाई यसको मजा लिँदै खेल्न म हौशला दिनेछु ।'
यस्तै यति धेरै समर्थको सामु खेल्न पाउनु एक अवसर रहेको अमेरिकाका कप्तान सौरभले बताए ।
'यति धेरै समर्थकको सामु खेल्न पाउनु एक अवसर हो । यसले हामीलाई एक चुनौतीको साथ हौशला समेत दिनेछ,' कप्तान सौरभले भने, 'हामी प्रतिस्पर्धात्मक खेलको अपेक्षामा छौं ।'
अन्तिम पटक सन् २०१० मा नेपाल भ्रमण गरेको अमेरिकाको टिममा अहिले धेरै परिवर्तन आएको छ । २/३ खेलाडी बाहेक उसको खेलाडीमा समेत नयाँ छन् । सो बेला डिभिजन पाँच खेल्न नेपाल आएको अमेरिका फाइनलमा नेपालसँग पराजित भएको थियो ।
