काठमाडौं । आईसीसी विश्वकप क्रिकेट लिग–२ अन्तर्गतको त्रिकोणात्मक सिरिजको पहिलो खेलमा ओमानले नेपाललाई १ सय ९८ रनको मध्यम लक्ष्य दिएको छ ।
त्रिवी क्रिकेट मैदानमा टस हारेर पहिले ब्याटिङ गरेको ओमानले ५० ओभरमा ९ विकेट गुमाएर १ सय ९७ रन बनायो ।
ओमानका लागि मोहमद नदीमले अविजित रहदै ६९ अर्धशतकीय इनिङ्स खेले । उनले ९६ बलमा ५ चौका र २ छक्का प्रहार गरे ।
सन्दीप गौदले ३३ रन जोड्दा कप्तान जसन मसुदले २० रन बनाए । त्यस्तै ओमानका अकिब अयासले १६ रन बनाउनु बाहेक अन्य खेलाडीले दोहोरो अंक छुन सकेनन् ।
नेपालका करण केसीले ४ विकेट लिए । डेब्यु खेलाडी सुशन भारीले ३ विकेट हात पारे । यस्तै दिपेन्द्र सिंह ऐरीले १ विकेट हात पारे ।
सन्दीप लामिछाने भने विकेट विहीन बनेको छ ।
पहिलो ओभरको अन्तिम बलमा करणले ओमानका जितेन्दर सिंहलाई ४ रनमा बोल्ड गरे । यस्तै दोस्रो विकेटको रुपमा करणले सातौँ ओभरको चौथो बलमा खवर अलीलाई ५ रनमा किपर विनोद भण्डारीको हातबाट क्याच गराए ।
१३ औं ओभरमा छिटो रन लिने क्रममा दिपेन्द्रले अकिब अयासलाई रन आउट गरे । यस्तै डेब्यु खेलाडी सुशनले आफ्नो पहिलो ओभरमा जसन मसुद र सुरार कुमारलाई आउट गर्दै ओमानको इनिङ धरापमा पारेका थिए ।
सुशनले मसुदलाई एलबीडब्लु र सुरजलाई कप्तान ज्ञानेन्द्र मल्लको हातबाट क्याच गराए ।
तर, पाँचौं विकेटका लागि महोमद नदीम र सन्दीप गौडले ६० रनको अर्धशतकीय रनको साझेदारी गर्दै ओमानको इनिङ उकासेका थिए ।
उत्कृष्ट ब्याटिङ गरिरहेका सन्दीपलाई सुशनले विनोदको हातबाट स्टम्पिङ गराएर उनीहरुको साझेदारी तोडेका थिए । यस्तै बादल सिंहलाई ४ रनमा दिपेन्द्रले रोहित पौडेलको हातबाट सर्ट कभरमा क्याच गराए ।
आठौं विकेटको रुपमा नशिम खुशीलाई करणले शरद भेषवाकरको हातबाट सर्ट थर्ड म्यानमा आउट पारे । सोहि ओभरमा करणले कलिमउल्लालाई विनोद हातबाट आउट गरे ।
