ओमानसँग नेपालको परिक्षा !

काठमाडौं । २४ वर्षे क्रिकेट इतिहासमा नेपालले पहिलो पटक घरेलु मैदानमा भोली (बुधबार) एकदिवसीय अन्तराष्ट्रिय क्रिकेट खेल्दैछ ।

नेपालले एकदिवसीय मान्यता २ वर्ष अघि मात्र पाएको थियो । सन् २०१८ मा भएको विश्वकप छनोटमा नेपालले पहिलो पटक एकदिवसीय अन्तराष्ट्रिय पाएको थियो ।

एकदिवसीय अन्तराष्ट्रिय मान्यता पाएपछि नेपालले ६ वटा खेल खेलेको छ, तर सबै विदेशी भूमिमा ।

एकदिवसीय अन्तराष्ट्रिय मान्यता पाउँदा नेपाल क्रिकेट संघ (क्यान) निलम्बन रहेको कारण नेपालले हालसम्म घरेलु मैदानमा एकदिवसीय अन्तराष्ट्रिय खेल खेल्ने संयोग जुर्न सकेन ।

तर, आईसीसी विश्वकप क्रिकेट लिग-२ अन्तर्गत नेपालले बुधबार ओमानसँग ऐतिहासिक एकदिवसीय अन्तराष्ट्रिय खेल खेल्दैछ । यस खेल सिरिजमा नेपालको पहिलो खेल समेत हो ।

ऐतिहासिक खेलमा घरेलु दर्शक सामु मैदान उत्रँदा नेपाललाई जित निकाल्न सहज भने छैन ।

नेपालले दुई महिना देखि ५० ओभरको खेल खेलेको छैन । पछिल्लो समय नेपालले एसीसी इमर्जिङ कप बाहेक अन्य खेल खेलेको छैन । प्रतियोगितामा नेपालले खासै राम्रो प्रदर्शन देखाउन सकेको थिएन । यद्दपी नेपालले क्यान-११ को नामबाट सिरिजको लागि ३ वटा अभ्यास खेल खेलेको थियो ।

ठिक २ वर्षअघि नेपालले अन्तिम एकदिवसीय अन्तराष्ट्रिय क्रिकेट खेलेको थियो । नेपालले युएई भ्रमणमा घरेलु टिमलाई २-१ अन्तरले परागित गर्दै ऐतिहासिक सिरिज जितेको थियो ।

त्यसयता नेपालले ५० ओभरको आधिकारिक खेल नै खेलेको छैन । यस्तै नेपालको भरपर्दा ब्याट्सम्यान पारस खड्का तथा लेग स्पिनर बलर सन्दीप लामिछानेले ५० ओभरको खेल नखेलेको समेत २ वर्ष भएको छ । यद्दपी उनीहरु दुवै टी-ट्वान्टीमा ब्यस्त हुँदै आएका छन् ।

यस्तै ओमानविरुद्ध नेपालले खेलेको ५० ओभरको खेलको तथ्यांक हेर्ने हो भने नेपालको पछिल्लो खेल निकै खराब रहेको देखिन्छ। तथ्यांक हेर्दा ओमानलाई नेपालले पछिल्लो सात वर्षदेखि पराजित गर्न सकेको छैन ।

हालसम्म नेपाल र ओमान ७ पटक एकदिवसीयमा आमने सामने भएका छन् । जसमा नेपाल र ओमान दुवैले समान ३-३ खेल जितेका छन् ।

नेपालले सुरुवाती ३ खेलमा जित हात पारेको थियो । ओमानले पछिल्लो ३ खेलमा नेपाललाई पराजित गर्दै आएको छ ।

यस्तै ओमानविरुद्ध नेपालले हालसम्म २ सय २१ रन भन्दा माथिको स्कोर बनाउन सकेको छैन । सन् २०१८ को एसीसी इमर्जिङ कपमा पहिले ब्याटिङ गरेर ५० ओभरमा ९ विकेट गुमाएर २ सय २१ रन बनाएको थियो । खेलमा नेपाल ७ विकेटले पराजित भएको थियो ।

नेपालले बनाएको १ सय ३८ रन ओमानविरुद्धको सबैभन्दा कम स्कोर हो । ओमानसँगको अन्तिम भेट सन् २०१८ को विश्व क्रिकेट लिग डिभिजन-२ मा नेपालले पहिले ब्याटिङ गर्दै ४६ ओभरमा अल आउट हुँदै १ सय ३८ रन बनाएको थियो । खेलमा नेपाल ६ विकेटले पराजित भएको थियो ।

ओमानविरुद्ध सागर पुन अर्धशतक प्रहार गर्ने एक मात्र नेपाली खेलाडी हुन् । उनले सन् २०१८ को एसिया कप छनोटमा ओअमानविरुद्ध ८४ बलमा ८३ रन बनाएका थिए ।

ओमानले भने विश्वकप लि- २ अन्तर्गतको ६ खेल खेलीसकेको छ । ६ खेलमा ४ जित सहित ८ अंक बटुलेको ओमान अंक तालिकाको चौथो स्थानमा रहेको छ । उसले आफ्नो राजा मरेका कारण दोस्रो सिरिजको अन्तिम २ खेल छाडेको थियो । सिरिजमा उसले बलियो टिम स्कटल्याण्ड, पीएनजी र युएईलाई पराजित गरिसकेको छ ।

यस्तै ओमान सिरिजमा सतप्रतिशत जितका लागि नेपाल आएको छ । सिरिजमा उसले ८ अंकको लागि ४ खेल्ने छ ।

ओमान लिगमा शीर्ष ३ भित्र पर्ने मात्र नभएर उसको लक्ष्य त्यसपछिको विश्वकप रहेको छ ।

'स्कटल्याण्ड र ओमानमा हामीले सफल दुई सिरिज खेलिसकेका छौं ।' ओमनका मुख्य प्रशिक्षक दुपिल मेण्डिजले भने, 'सन् २०२३ को विश्वकप खेल्न ओमान निकै लागिपरेको छ र त्यसको लागि हामी तयार छौं ।'

सिरिजमा शीर्ष ३ मा पर्ने राष्ट्रले भारतमा हुने सन् २०२३ को विश्वकप छनोट खेल्न पाउने छन् । १० टिम सहभागी हुने छनोटमा फाइनल पुग्ने टिमले विश्वकप खेल्न पाउने छन् ।