काठमाडौं । मुख्य प्रशिक्षक फेरिदाँ राष्ट्रिय पुरुष भलिबल टिमका खेलाडी अलमलमा परेका छन् । पछिल्लो समय नेपाली प्रशिक्षकसंग प्रशिक्षण गरिरहेका भलिबल टिमका खेलाडी नयाँ विदेशी प्रशिक्षक आउदाँ अलमलमा परेका हुन् ।
‘पुरानो फर्म्याटमा खेल्ने गरेका थियौ । तर विदेशी प्रशिक्षकले नयाँ फर्म्याटमा खेल्न सिकाउनु हुन्छ,’ भलिबल टिमका कप्तान ईम रानाले भने, ‘दुई नम्बर जोनमा खेल्ने खेलाडीले रिसिभ गर्ने भनेर खेलियो । तर नयाँ प्रशिक्षकले दुई नम्बर जोनमा खेल्नेले रिसिभ नगर्ने, मात्र अंक ल्याउन ध्यान दिने सिकाउनु हुन्छ ।’
एभिसी सेन्ट्रल जोन भलिबलमा नेपाली टिमलाई डच प्रशिक्षक हान एबिङले प्रशिक्षण दिएका थिए ।
उनीले असारको पहिलो साताबाट भर्दौको दोस्रो सातासम्म नेपालमा बसेर खेलाडीलाई प्रशिक्षण दिएका थिए । उनी करिब साढे २ महिना प्रशिक्षण दिएर फर्किए ।
एभिसी लगत्तै नेपाली टिम १३ औ दक्षिण एसियाली खेलकुद प्रतियोगिता (साग)को तयारीमा जुटेको थियो । लगत्तै भलिबल टिमलाई विरेन्द्र चौधरीले प्रशिक्षण गराईरहेका थिए ।
चौधरीले भलिबल टिम हेरिरहेको अवस्थामा नेदरल्याण्डकै लेस्ले डी जोङ मुख्य प्रशिक्षकको रुपमा राष्ट्रिय टिमसंग जोडिएका हुन् । प्रतियोगिताको संघारमा प्रशिक्षक फेरिदाँ खेलाडीले प्रशिक्षणमा असहज महशुश गरेका छन् ।
सागलाई लक्षित गरेर भलिबल टिमले साउनबाट बन्द प्रशिक्षण सुरु गरेको थियो । सागको तयारी स्वरूप टिम कात्तिकको अन्तिम साता प्रशिक्षण तथा मैत्रीपूर्ण खेलका लागि भारतको बैंङ्लोर गएको थियो ।
करिब दुई साता भारतमा रहदाँ नेपालले भारतसंग तीन मैत्रीपूर्ण खेल खेलेको थियो । नेपाली प्रशिक्षक विरेन्द्र चौधरीबाट प्रशिक्षण लिईरहेको नेपाली टिम भारतमै रहदाँ डी जोङ जोडिन आईपुगेका हुन् ।
नेपाली टिमको मुख्य प्रशिक्षकमा नियुक्त भएका डी जोङ र विरेन्द्रको समन्वयमा खेलाडीले प्रशिक्षण गरिरहेका छन् । एसियाली खेलकुदमा पुरुष भलिबल टिमको उच्च प्रर्दशनलाई मुल्याङ्कन गर्दै नेपाल भलिबल संघले डी जोङलाई पुन टिम हेर्न बोलाएको हो ।
तर छोटो समयमा नयाँ प्रशिक्षक पाउँदा खेलाडी भने अलमलमा परेका हुन् । नेपाली प्रशिक्षकबाट सिक्दै गरेका खेलाडी नयाँ विदेशी प्रशिक्षक पाउँदा प्राविधिक रुपमा असहज महसुस गरेका छन् ।
‘नेपाली खेलाडी लागि नयाँ फर्म्याट हैन । एसियन गेम्स र सेन्ट्रल जोनमा समेत नेपालले यही फर्म्याटमा खेलेको थियो ।’ कप्तान ईमले थपे, ’तर नयाँ खेलाडीले नयाँ फम्र्याटमा खेल्न सकेका छैनन् ।’
नयाँ प्रशिक्षकबाट सिक्ने समय नभएको कारण नेपाली टोलीले आफ्नो गल्ती सुधार गर्न ध्यान केन्द्रित गरेको ईमले बताए ।
विदेशी प्रशिक्षक पाउँदा खेलाडी खुशी र उत्साहित छन् । तर प्रशिक्षक नियुक्त गर्ने समय भने गलत रहेको खेलाडीको बुझाई छ ।
‘लेस्ले ल्याउनु गलत हैन । तर ल्याउनुनै थियो भने चाँडै ल्याउनु पर्ने थियो ।’ उनले भने, ’ट्रेनिङ सुरु गर्दादेखि नै ल्याएको भए राम्रो हुने थियो ।’
छोटो समयका लागि आएका प्रशिक्षक डी जोङ भने खेलाडीको जोस, जाँगर र मेहनत देखेर निकै उत्साहित छन् ।
‘दुई हप्ता बाँकी रहेको बेला नेपाल आएको छु । दिनको दुई पटक प्रशिक्षण दिदाँ धेरै सुधार हुने विश्वास छ ।’ डी जोङले भने, ’एतिहासिक पदकको लागि मेहनत गरेका खेलाडीलाई घरेलु समर्थकले राम्रो साथ मिल्ने अपेक्षा छ ।’
-1732413260.jpg)
