काठमाडौं । १३ औं दक्षिण एसियाली खेलकुद प्रतियोगिता (साग) मा भारतको पुरुष टिमले फुटबलमा सहभागीता नजनाउने भएको छ ।
भारतले अन्तिम समयमा आएर फुटबल स्पर्धामा सहभागी नहुने निर्णय गरेको हो ।
भारतीय ओलम्पिक कमिटिले यसअघि फुटबलको महिला र पुरुष स्पर्धामा सहभागी हुने बताएको थियो ।
सोही अनुसार भारतलाई समावेश गर्दै पुरुष स्पर्धाको 'ड्र' सार्वजनिक गरिएको थियो ।
नेपाल रहेको समूह एमा बंगलादेश र भुटान थिए । भारत रहेको समूह बीमा माल्दिभ्स र श्रीलंका थिए । तर अन्तिम समयमा भारतीय ओलम्पिक कमिटिले सागको पुरुष फुटबलमा आफु सहभागी नहुने स्पष्ट पारेको हो । भारतको महिला टिमले भने साग खेल्नेछ ।
दक्षिण एसियाली फुटबलमा भारत सबैभन्दा बलियो देश मानिन्छ । भारतलाई हराउँदै नेपालले अघिल्लो साग फुटबलमा पुरुष स्पर्धामा स्वर्ण जितेको थियो ।
साग फुटबलमा यू-२३ टिमको प्रतिस्पर्धा हुने गर्छ । हरेक टिमले २३ वर्षमाथिका तीन खेलाडी खेलाउन पाउछन् ।
सुरुमा राष्ट्रिय टिमनै सागमा सहभागी हुने भएपनि सन् २००४ पछि यू–२३ टिमले प्रतिस्पर्धा गर्न लागेका हुन् ।
तर महिला स्पर्धामा भने राष्ट्रिय टिमलेनै खेल्न पाउने प्रावधान छ । महिला स्पर्धाको खेल पोखरामा र पुरुष स्पर्धाको टिम काठमाडौंका दशरथ रंगशालामा हुने तय छ ।
किन आएन भारत ?
भारतीय फुटबल महासंघले घरेलु फुटबलको व्यस्त तालिकालाई साग नखेल्नुको मुख्य कारण देखाएको छ । उसले साग फुटबल विश्व फुटबलको सर्वोच्च निकाय फिफाको क्यालेन्डरमा नभएका कारण सहभागिता जनाउने नसकिएको बताएको हो ।
साग फुटबललाई फिफाको मान्यता छैन । फिफाको क्यालेन्डरमा नभएको कारण भारतीय क्लबले खेलाडी छाड्न नमानेको बुझिएको छ । सोही कारण भारतीय फुटबल महासंघले सागका लागि खेलाडी उपलब्ध गराउन सकेन ।
फिफाद्वारा मान्यता प्राप्त खेलमा मात्र क्लबहरु खेलाडी छाड्न बाध्यकारी हुन्छन् । सोही कारण भारतीय क्लबले सागका लागि खेलाडी रिलिज नगरेको बुझिएको छ ।
भारतीय फुटबलले एसियामै आफुलाई बलियो बनाउँदै लगेको छ । दुई वटा शीर्ष डिभिजनको लिग खेल्ने भारतीय क्लबहरुले सिजनभरका लागि खेलाडीलाई मोटो रकम खर्चिएर अनुबन्धन गरेका हुन्छन् ।
बर्षभरी व्यस्त तालिकामा रहने भारतीय फुटबल क्लबले सागका लागि खेलाडी छाड्न नमानेका हुन् ।
के भन्छ नेपाल ओलम्पिक कमिटि ?
नेपाल ओलम्पिक कमिटि एनओसीले सागको अनिश्चित मितिका कारण फिफा लगायत अन्तराष्ट्रिय संस्थासंग समन्व्य गर्न नसकिएको स्विकार गरेको छ ।
'साग निर्धारित मितिमा नहुने पुरानै रोग छ । सोही कारण अन्तराष्ट्रिय क्यालेन्डरमा खेलहरुलाई समावेश गर्न र समन्व्य गर्न समस्या हुँदै आएको छ ।' एनओसीका एक पदाधिकारीले खेलपाटीसंग भने ।
