खेलाडीको 'डाइट' - एउटा स्याउ र दुई केरा !

काठमाडौं । दिउँसोको ४  बजिसकेको थियो ।

घाम अस्ताउने तरखरमा थियो ।

सातदोबाटोस्थित एन्फा मैदानमा अभ्यासको लागि महिला खेलाडीहरु  आउने क्रम चलिरहेको थियो ।

केहि आईसकेका थिए । केहि आउन बाँकि थियो । केहि खेलाडी ड्रेस चेन्ज गर्दै थिए ।

घरेलु भूमिमा आयोजना हुने १३ औं दक्षिण एसियाली खेलकुद (साग) अन्तर्गत महिला फुटबल टिमको तयारी ५ बजे पछि हुने तालिका थियो ।

साेही मैदानमा क्विक्स कप चलिरहेको कारण महिला टिमको प्रशिक्षण साँझ ५ बजेपछि राखिएको थियो ।

प्रशिक्षणका लागि महिला खेलाडीहरु एन्फा कम्प्लेक्स छिर्दै गर्दा एक जुनियर खेलाडी एन्फाको गेटबाट बाहिर निस्किदै थिईन । प्रशिक्षण सुरु हुनै लाग्दा एक खेलाडी गेटबाट निस्किएपछि मलाई जिज्ञासा लाग्यो ।

अभ्यास सुरु हुन लाग्यो त, कता जान लाग्यौ ? मैले सोधे ।

‘दाई भोक लाग्यो, बाहिर पोलेको मकै खान जान लागेको,’ उनले भनिन् ।

राष्ट्रिय टिममा पर्ने लक्ष्य बनाएर प्रशिक्षणमा आएकी उनको यो रहर थिएन । करिब २ घण्टाको कडा प्रशिक्षणको लागि उनको तयारी थियो ।

किनकी भोक-भोकै कडा प्रशिक्षण गरेर राष्ट्रिय टिममा स्थान बनाउन सहज छैन ।

भोकै टिमका सिनियर खेलाडीसँग कडा प्रशिक्षण गर्न कठिन भएकाे हुनुपर्छ । उनी त एक उदाहरणको पात्र मात्रै हुन् ।

एन्फा परिसरको बाटोमै रहेको मकै पसल र चटपटे पसलमा अन्य खेलाडीको पनि भीड हुने गर्छ । सबै खेलाडीको समस्या एउटै छ ।

अधिकांस महिला खेलाडी साँझमा हुने प्रशिक्षण खाली पेटमै गर्न बाध्य छन् । किनकी अखिल नेपाल फुटबल संघ (एन्फा) ले खेलाडीलाई पर्याप्त 'डाइट' उपलब्ध गराउन सकेको छैन ।

एन्फाले २ घण्टाको तयारी पछि खेलाडीलाई दिने 'डाइट' भनेको सुप, दुई केरा, एक स्याउ र एक पाउरोटी मात्र हो । एन्फा भने भोकै प्रशिक्षणमा होमिने खेलाडीबाट स्वर्ण ल्याउने सपना देखेको छ ।

एन्फाले पर्याप्त 'डाइट' उपलब्ध नगराएपछि कतिपय खेलाडी घरमै खाजा खाएर आउने गर्छन । तर, प्रशिक्षणमा आउने खेलाडी सबै व्यबसायिक खेलाडी छैनन् ।

कतिपय राष्ट्रिय टोलीका खेलाडी अझै अभ्यासको लागि सार्वजनिक गाडीको सहारामा प्रशिक्षण स्थल आउने र जाने काम गर्छन् । विभागीय टिमका खेलाडी त विभागको ट्रेनिङ सकेर राष्ट्रिय टिमको प्रशिक्षणमा आउन बाध्य छन् ।

घरबाट खाजा खाएर सार्वजनिक गाडीको यात्राबाट एन्फा मैदानसम्म पुग्दा खेलाडी भोक र थकानले गलेका हुन्छन् । त्यसपछि प्रशिक्षण सुरु गर्नुअघि उनीहरुको सहारा त्यही पोलेको मकै र चटपटे हुने गर्छ ।

एन्फाले उपलब्ध गराएको डाइटले प्रशिक्षणका लागि आउने खेलाडीलाई नपुग्ने सम्बन्धित क्षेत्रमा काम गरिरहेका विज्ञहरु बताउछन् ।

राखेपको फिजियो भएर गरिसकेका फिजियोथेरापिष्ट बिक्रम न्यौपाने खेलाडीलाई दुई केरा र एक स्याउको भरमा प्रशिक्षण गराउनु उपयुक्त नभएको बताए ।

‘नेपालमा जे जति डाइट दिईन्छ त्यसले खेलाडीलाई केहि पुग्दैन । सुगरबाट बच्न खेलपछि केरा र स्याउ दिनु ठिक हो । तर,यतिले खेलाडीको प्रदर्शनमा केहि फरक ल्याउँदैन ।’ न्यौपानेले भने ।

एन्फाले उपलब्ध गराएको 'डाइट' ले नपुग्ने स्वयम खेलाडीलाई थाहा छ । तर, उनीहरु एन्फासँग यो कुरा गर्न सक्दैनन् । धेरै बोले टिममा पर्न गाह्रो हुने नियत खेलाडीले झेल्दै आएको छन् । 

राष्ट्रिय टिमकी नियमित एक सदस्यले एन्फाले डाइटमा केहि नदिने भएकै कारण आफुहरु घरमै लिने गरेका बताउँछिन् ।

‘एन्फाले डाइटको नाममा केरा र स्याउ मात्रै दिईरहेको छ । हामीलाई यतिले पुग्दैन । आफ्नो खर्चले खाने गरेका छौं,’ नाम उल्लेख नगर्ने शर्तमा उनले भनिन् ।

राष्ट्रिय खेलकुद परिषद् (राखेप) का सदस्य सचिव रमेश सिलवालले सागमा सहभागी हुने २७ वटै संघको पदाधिकारीसँगको अन्तरक्रियामा भनेका थिए, ‘हामीले धेरै पदकको लागि खेल्नुपर्छ, खेलाडीलाई डाईटको कुनै समस्या हुँदैन । लिष्ट बनाएर दिनुस् । म सबै झिकाउछु ।’

तर, सदस्य सचिव सिलवालको भाषण एन्फा भित्र तयारी गरिरहेका महिला खेलाडीको हकमा लागु भएको छैन ।

महिला राष्ट्रिय टिमका मुख्य प्रशिक्षक हरि खड्काले एन्फाले उपलब्ध गराउने 'डाइट' खेलाडीलाई नपुग्ने बताउँछन् ।

‘खेलाडीलाई जति हुनुपर्ने हो त्यो छैन । अहिले एन्फाले दिने त्यति हो । अब क्याम्प भएपछि केहि राम्रो होला,’ प्रशिक्षक खड्काले भने ।

यता, महिला टिमकी संयोजक तथा एन्फाका केन्द्रिय सदस्य पेमा लामा खेलकुद परिषदबाट आउनुपर्ने डाइट नआएकाले खेलाडीले यसमै चित्त बुझाउनु परेको बताउँछिन् ।

‘राखेपबाट आउनुपर्ने आएको छैन । अहिले जति दिएका छौ । एन्फाबाट नै दिएको छ ।’ उनले भनिन् ।