काठमाडौं । ओलम्पिक छनोटको तयारीमा रहेको नेपाली राष्ट्रिय पारा तेक्वान्दो खेलाडीले जापानमा विशेष प्रशिक्षण गर्ने भएका छन् ।
अर्को वर्ष आयोजना हुने ओलम्पिक खेलकुदलाई लक्षित गर्दै पारा तेक्वान्दो टोलीले जापानको मिकिसिटी सहरमा प्रशिक्षण गर्ने भएका हुन् ।
जापानको मिकिसिटी सहरले एक साताका लागि पारा टोलीको प्रशिक्षण मिलाइएको हो । मिकिसिटीका मेयर काजुहिकु नाकाताको विशेष निमन्त्रणामा पारा टोली त्यसतर्फ जान लागेको हो । नेपाली खेलाडीको बस्ने र खाने व्यवस्था मिकिसिटी महानगरपालिकाले गर्ने छ ।
नेपालबाट तीन ग्यरोगी र दुई पुम्से खेलाडी प्रशिक्षणमा सहभागी हुनेछन् । प्रशिक्षणका लागि जापान जाने खेलाडीहरुमा पलेसा गोवद्र्धन, दीपेश महत, रोहितहाङ राई, विक्रम श्रेष्ठ र सुवासचन्द्र राई छन् ।
यस्तै प्रशिक्षकमा कविराज नेगी लामा, व्यवस्थापकमा रोशन श्रेष्ठ र टोली नेतामा रामचन्द्र श्रेष्ठ छन् ।
नेपाली टोलीलाई शुक्रबार नेपाल तेक्वान्दो संघले बिदाइ गरेको छ । संघका अध्यक्ष प्रकाशशम्शेर राणा, महासचिव दीपराज गुरुङ र पारा तेक्वान्दो कमिटीका अध्यक्ष काशिममियाँ धोबीले सातदोबाटोमा बिदाइ गरे ।
आइतबार जापान जाने नेपाली टोलीले अगष्ट ५ देखि ११ तारिखसम्म प्रशिक्षण गर्ने छ । नेपाल तेक्वान्दो संघसँग भएको सम्झौता अनुसार नेपाली पारा खेलाडीले जापानमा दुई चरणमा प्रशिक्षण गर्ने छन् ।
नेपाली टोली पहिलो चरणको प्रशिक्षणका लागि जापान जान लागेको हो ।
