एजेन्सी । इटालियन क्लब युभेन्ट्समा रोनाल्डोले ७ नम्बरको जर्सी पाएका छन् । क्लबका मिडफिल्डर जुवान कुआर्डाडोले कीर्तिमानी मुल्यका स्ट्राईकर रोनाल्डोलाई ७ नम्बरको जर्सी हस्तान्तरण गर्ने भएका हुन् ।
रोनाल्डो कीर्तिमानी मुल्य सय मिलियन पाउण्डमा स्पेसिन क्लब रियल मड्रिडबाट इटालियन जायन्ट युभेन्ट्स आएका छन् । पोर्चुगलका स्ट्राईकरले इङ्लिस क्लब म्यान्चेष्टर युनाईटेड र स्पेनिस क्लब रियल मड्रिडमा रहदाँ ७ नम्बरको जर्सी लगाएर खेलेका थिए । उनको सीआर सेभेन प्रतिष्ठित ब्राण्डसमेत बनिसकेको छ ।
इङ्लिस क्लब चेल्सीबाट युभेन्ट्स आएका कुआर्डाडोलाई ७ नम्बरको जर्सी प्रदान गरिएको थियो । कुआर्डाडोले जर्सी पाउनु भन्दा दिनु आफुले धन्य महशुश गरेको बताएका छन् ।
उनी हालैमात्र विश्वकपमा सहभागि भएर फर्किएका छन् । उनको टोली कोलम्बिया नकआउट चरणको पहिलो खेलमा इङ्ल्याण्डसंग टाईब्रेकरमा पराजित हुदै घर फर्किएको थियो ।
रोनाल्डोको टोली पोर्चुगल समेत अन्तिम १६ को खेलमा उरुग्वेसंग २–१ ले पराजित हुदै प्रतियोगिताबाट बाहिरिएको थियो ।
