आठौंका लागि कब्बडी र खोखो छनोट सम्पन्न

पोखरा । आठौं राष्ट्रिय खेलुकुद प्रतियोगिताका लागि गण्डकी प्रदेशमा कब्बडी, खोखो खेलको छनोट सकिएको छ ।

कब्बडी खेलको पुरुष तर्फ नवलपुरले स्वर्ण जितेको छ भने कास्कीले रजत जितेको छ । तनहुँ र लमजुङले भने काश्य पदक जितेको कास्की जिल्ला खेलकुद बिकास समितीका कार्यालय प्रमुख प्रकाश बरालले बताए ।

कब्बडीको महिलातर्फ कास्कीले स्वर्ण, म्याग्दीले रजत र नवलपुरले काश्य पदक जितेका छन् ।

खोखोतर्फ पुरुष छनोटमा नवलपुरले स्वर्ण, गोर्खाले रजत र कास्कीले काश्य पदक हात पारेका छन् । यसै गरि महिला तर्फ नवलपुरले स्वर्ण र कास्कीले रजत पदक हात पारेको कार्यालय प्रमुख बरालले बताए ।

बिजेता खेलाडीहरुलाई पश्चिमाञ्चल क्षेत्रिय खेलकुद बिकास समितीका अध्यक्ष सम्पन्न श्रेष्ठले पदक तथा प्रमाणपत्र वितरण गरेका थिए ।

छनोट अन्तर्गत नै फुटबलमा गोर्खा र लमजुङ फाइनल प्रवेश गरेका छन । सम्पन्न खेलमा गोर्खाले तनहुँलाई ३–२ गोल अन्तरले पराजित गर्दे फाइनलमा स्थान सुरक्षित गरेको हो भने लमजुङले दावेदार मानिएको बागलुङलाई २–० गोलले पराजित गरेको छ ।
गोर्खालाई जिताउन बिकास गुरुङ र मिलन तामाङले समान १–१ गोल गरे भने एक गोल सुसाइडका रुपमा भएको थियो । तनहुँका लागि सन्त बहादुर गुरुङले २ गोल गरे । यता लमजुङलाई फाइनलमा पुर्याउन मनोज गुरुङले २ गोल गरे ।

महिला तर्फको फुटबलमा लमजुङले बागलुङलाई २–० ले पराजित गरेको छ । लमजुङका लागि पूर्णिमा गुरुङ र रन्जना लामाले गोल गरेका थिए । यसै गरि म्याग्दीले रेहा रोक्काको गोलको सहयोगले नवलपुरलाई १–० गोलले पाखा लगाएको छ ।