बलले लागेर बेन स्टोक्स घाइते

काठमाडौं। इङ्ल्यान्ड टेस्ट टोलीका कप्तान बेन स्टोक्स क्रिकेट बलको चोटबाट घाइते भएका छन्। उनको आँखामुनि गहिरो निलडाम देखिएको छ भने गाला र नाकतिर पनि चोट लागेको छ।

इन्स्टाग्राम स्टोरीमार्फत स्टोक्सले आफ्नो चोटबारे जानकारी दिएका हुन्। उनले सेयर गरेको तस्बिरमा आँखामुनिको भाग सुन्निएको देखिन्छ। गालामा केही रगत पनि लागेको छ। चोट अलिकति माथि लागेको भए उनको करिअर नै जोखिममा पर्न सक्थ्यो।

तस्बिरसँगै स्टोक्सले मजाकिया शैलीमा लेखेका छन्,‘क्रिकेट बलको हालत पनि एकचोटि जाँच्नुपर्छ।’ साथै उनले हाँसोको इमोजी पनि प्रयोग गरेका छन्।

क्रिकइन्फोका अनुसार स्टोक्स खेलको क्रममा ब्याटिङ वा बलिङ गर्दा होइन, नेट सेसनका बेला छेउमा उभिँदा घाइते भएका हुन्। स्टोक्स इङ्ल्यान्ड लायन्स टोलीको कोचिङ स्टाफमा सामेल हुने तयारीमा छन्।

यसै महिना संयुक्त अरब इमिरेट्समा पाकिस्तान शाहिन्सविरुद्ध हुने सीमित ओभरको सिरिजमा उनी मोइन अलीसँगै लायन्सका मुख्य प्रशिक्षक एन्ड्र्यु फ्लिन्टफको सहकार्यमा काम गर्नेछन्।

यस सिरिजमा इङ्ल्यान्ड लायन्सले तीनवटा टी–२० र पाँचवटा ५० ओभरका खेल खेल्नेछ। तीन वर्षपछि यो सिरिजमार्फत इङ्ल्यान्ड लायन्सको तालिकामा प्रतिस्पर्धात्मक सेतो बलको क्रिकेट फर्किन लागेको हो।

स्टोक्सले यो सिरिजमा काम गर्ने अवसरलाई एशेजमा लागेको चोटको पुनःस्थापना प्रक्रियाको भागका रूपमा लिएका थिए। सिड्नीमा भएको एशेजको पाँचौं टेस्टमा बलिङ गर्ने क्रममा उनी ‘ग्रोइन’ चोटबाट पीडित भएका थिए।