जितको लयमा फर्कियो सिटी, संकटमै पुग्यो युनाइटेड

काठमाडौं। म्यानचेस्टर सिटी जितको लयमा फर्किएको छ भने म्यानचेस्टर युनाइटेड भने फेरि संकटमै पुगेको छ।

आइतबार इतिहाद स्टेडियममा भएको १९७औं म्यानचेस्टर डर्बीमा सिटीले युनाइटेडलाई ३–० ले पराजित गरेको हो। मुख्य प्रशिक्षक रुबेन अमोरिमका लागि यो अर्को लज्जास्पद दिन बनेको छ। खेल अझै ठूलो अन्तरले सकिन सक्थ्यो, तर सिटीका आक्रमण रोकिए।

सिटीका एर्लिङ हालान्डले दोस्रो हाफमा दुई गोल गरे र एक पटक पोस्टमा पनि हाने। यसअघि मंगलबार मोल्दोभाविरुद्ध नर्वेका लागि पाँच गोल गरेका हालान्डले एक साताभित्र सात गोल पूरा गरेका छन्।

सिटीका फिल फोडेनले १८औं मिनेटमा हेडरमार्फत पहिलो गोल गरेका थिए। त्यसपछि पेप ग्वार्डियोला नेतृत्वको टोलीले खेलमै नियन्त्रण जमायो।

यो जितसँगै सिटीले दुई खेलको हारको सिलसिला तोडेको छ। तर, युनाइटेड र अमोरिमका लागि समस्या थपिएको छ। यसअघि चौथो डिभिजनको ग्रिम्सबीसँग लिग कपबाट अपमानजनक हार बेहोरेको युनाइटेड अहिले निराशाजनक अवस्थामा छ।

खेलपछि अमोरिमले समर्थकलाई सन्देश दिए,‘म क्लबका लागि सर्वोत्तम सोचेर गर्नेछु। जित्न म चाहन्छु, त्यसैले तपाईंहरू भन्दा बढी म पीडामा छु।’

युनाइटेडमा संकट

युनाइटेडको यो हार क्लबका सह–मालिक जिम राटक्लिफको सामु भएको हो। अमोरिमलाई उनले गत वर्ष नियुक्त गरेका थिए, टोलीलाई युरोपेली फुटबलको शिखरमा फर्काउने लक्ष्यसहित। तर, हालको अवस्थाले पुनरागमन निकै कठिन देखाएको छ।

यो सिजन सबै प्रतियोगितामा युनाइटेडले पाँच खेलमध्ये एक खेल (३–२ बर्न्लीविरुद्ध) मात्र जितेको छ, त्यो पनि अन्तिम समयमा ब्रुनो फर्नान्डेजको पेनाल्टीमार्फत।

गत नोभेम्बरमा नियुक्त भएपछि अमोरिमले प्रिमियर लिगमा ३१ खेलमध्ये ८ मा जितेका छन्। उनको कार्यकालमा क्लबले सबैभन्दा तल्लो स्थान (१५औं) हासिल गरेको थियो।

‘यो रेकर्ड म्यानचेस्टर युनाइटेडको हुनै हुँदैन,’ अमोरिमले स्वीकारे। तर उनले आफ्नो शैलीमा अडान जनाउँदै भने,‘जब म आफ्नो दर्शन बदल्न चाहन्छु तब बदल्छु, नभए परिवर्तन मान्छेमा हुन्छ। म आफ्नै बाटोमा खेल्छु, जबसम्म म आफैंले बदल्न चाहन्न।’

यथार्थमा चार खेलमा जम्मा चार अंकसहित युनाइटेडले सन् १९९२ पछि सबैभन्दा खराब सुरुआत गरेको छ।

घातक हालान्ड

हालान्ड यो सिजन क्लब र देश दुवैका लागि घातक लयमा छन्। सिटी र नर्वेका लागि खेलेका ६ खेलमा उनले ११ गोल गरिसकेका छन्। टोटनह्यामविरुद्धको २–० हारमा मात्र उनी गोलविहीन भए।

युनाइटेडको डिफेन्स चिर्दै उनले ५३औं र ६८औं मिनेटमा गोल गरे। ह्याट्रिक बनाउन सक्थे तर अर्को प्रयास पोस्टमा ठोकियो। सहखेलाडी फिल फोडेनले यसलाई पूर्ण प्रदर्शन भने भने ग्वार्डियोलाले हालान्डलाई विशेष खेलाडी भन्दै प्रशंसा गरे।