बार्सिलोनाको आधा दर्जन गोल

काठमाडौं। चोटका कारण लमिन यामल अनुपस्थित रहे पनि बार्सिलोनाले स्पेनिस लिगमा उत्कृष्ट सुरुआतलाई निरन्तरता दिएको छ। आइतबार रफिन्हा, रोबर्ट लेवान्डोव्स्की र फेर्मिन लोपेजले दुई–दुई गोल गरेसँगै बार्सिलोनाले भ्यालेन्सियामाथि ६–० को एकतर्फी जित निकालेको हो।

खेल क्याम्प नोउमा नभई क्लबकै प्रशिक्षण मैदान जोहान क्रुइफ स्टेडियममा खेलिएको थियो। करिब ६ हजार क्षमताको यो मैदानमा बार्सिलोनाको महिला टोली, रिजर्भ र युवा टोली खेल्ने गर्छन्। करिब एक लाख दर्शक अटाउने क्याम्प नोउ पुनःउद्घाटनका लागि अझै अनुमति नआएकाले बार्सिलोनाले अस्थायी रूपमा यहाँ खेलेको हो।

लोपेजले २९औं र ५६औं मिनेटमा गोल गरे। त्यसपछि रफिन्हाले ५३औं र ६६औं मिनेटमा तथा लेवान्डोव्स्कीले ७६औं र ८६औं मिनेटमा गोल थपे। विशेष कुरा रफिन्हा र लेवान्डोव्स्की बेञ्चबाट मैदान प्रवेश गरेपछि गोल गरेका हुन्।

स्पेनिस मिडियाले रफिन्हा ढिलो रिपोर्ट भएकाले सुरुआतमा खेल्न नपाएको दाबी गरे पनि प्रशिक्षक हान्सी फ्लिकले यो प्राविधिक निर्णय भएको बताए।

१५०औं खेल खेलिरहेका लेवान्डोव्स्कीले यसअघि यो सिजनमा लिगमा गोल गरेका थिएनन्। बार्सिलोनाका मिडफिल्डर मार्क कासादोले भने,‘हामी सुरुदेखि नै नियन्त्रणमा थियौं, जितका लागि के गर्नुपर्छ भन्ने थाहा थियो। आफ्नो खेल खेल्यौं र त्यसअनुरुप गोल आयो।’

भ्यालेन्सिया यो सिजनको सुरुआतमै संघर्षरत छ। दुई हारसँगै तल्लो स्थानमा रहेका उनीहरूले बार्सिलोनाविरुद्ध दुई पटक मात्र प्रहार गर्न सके, जसमा एउटामात्र लक्ष्यमा थियो।

बार्सिलोनाले पछिल्ला तीन खेलमा भ्यालेन्सियामाथि १८–१ को गोल अन्तर कायम गरेको छ। यस जितपछि बार्सिलोना चार खेलमा तीन जित निकाल्दै तालिकामा ९ अंकसहित दोस्रो स्थानमा छ। शीर्ष स्थानमा रहेको रियल मड्रिडको भने ११ अंक छ।