काठमाडौं। म्यानचेस्टर युनाइटेडले घरेलु समस्यालाई एकछिन बिर्सँदै फ्रेन्च क्लब लियोनविरुद्ध ५–४ को रोमाञ्चक जित निकाल्दै युरोपा लिगको सेमिफाइनलमा स्थान बनाएको छ।
ओल्ड ट्राफोर्डमा भएको नाटकीय खेलमा घरेलु लिगमा संघर्ष गरिरहेको युनाइटेडले पहिलो हाफमा २–० को अग्रता बनाएको थियो। दोस्रो हाफमा छिट्टै दुई गोल खाँदै समग्रमा खेलमा ४–२ ले पछि परेको थियो। तर अतिरिक्त समयमा १० खेलाडीमा सीमित लियोनविरुद्ध तीन गोल फर्काउँदै युनाइटेडले ऐतिहासिक पुनरागमन गरेको हो।
ह्यारी म्याग्वायरले अतिरिक्त समयको अन्तिम मिनेटमा गरेको निर्णायक गोलले ओल्ड ट्राफोर्डमा खुसीको लहर ल्याएको हो। २० पटकको इङ्लिस च्याम्पियनको यो सिजनमा केही उपलब्धि हुने आशा जीवित रहने आशा कायम भएको छ।
‘हामीसँग यो सिजन विशेष बनाउने अझै समय छ, त्यसैले सकारात्मक सोच राख्नुपर्छ,’ युनाइटेडका प्रशिक्षक रुबेन अमोरिमले भने। अब युनाइटेडले सेमिफाइनलमा स्पेनिस क्लब एथ्लेटिक बिल्बाओसँग प्रतिस्पर्धा गर्नेछ। बिल्बाओले रेन्जर्सलाई २–० ले हराएर अन्तिम चारमा स्थान बनाएको हो।
त्यसैगरी टोटनह्यामले पनि फ्र्याङ्कफर्टलाई १–० ले हराउँदै समग्रमा २–१ को जित निकाल्दै सेमिफाइनलमा स्थान पक्का गरेको छ। युनाइटेड पुनरागमनका लागि चर्चित रहँदै आएको छ। विशेषतः सन् १९९९ को च्याम्पियन्स लिग फाइनलमा बायर्न म्युनिखविरुद्धको नाटकीय जितमा टेडी शेरिङ्घम र ओले गुनार सोल्सक्जाएरले अन्तिम क्षणमा गोल गरेका थिए।
तर, यसपल्ट युनाइटेड लिगमा १४औं स्थानमा छ। प्रिमियर लिग युगको इतिहासमै सबैभन्दा कम अंकसहित सिजन समाप्त गर्ने स्थितिमा छ। युरोपा लिग अमोरिमको लागि यस सिजनको अन्तिम आशा हो। साथै यसले अर्को सिजन च्याम्पियन्स लिगको स्थान पनि सुरक्षित गराउनेछ।
म्यानुअल उगार्टे र डिओगो डालोटको गोलले युनाइटेडलाई पहिलो हाफमा २–० को अग्रता दिलाएको थियो। ब्रुनो फर्नान्डेजको प्रहार बारमा लाग्नु र एलेजान्द्र गार्नाचोले अवसर खेर फाल्नुको बाबजुद अग्रता सुरक्षित थियो।
तर, दोस्रो हाफमा करेन्टिन टोलिसो र निकोलस टाग्लियाफिकोले ६ मिनेटमै दुई गोल गर्दै खेल बराबरी गरे। टोलिसो ८९औं मिनेटमा रातो कार्ड खाँदा लियोन १० खेलाडीमा सीमित भयो। तर, अतिरिक्त समयमा रायन चर्ची र एलेक्जान्द्रे लाकाजेटको पेनाल्टीले लियोनलाई ४–२ को अग्रता दिलायो।
केही समर्थकहरू मैदान छोड्न थालेको बेला युनाइटेडले पुनः आश्चर्यजनक पुनरागमन गर्यो। ब्रुनो फर्नान्डेजले पेनाल्टीबाट गोल गरे र त्यसपछि कोबी माइनुले बाकस भित्रबाट गरेको कर्लिङ प्रहारले खेल बराबरी गर्यो।
अन्ततः स्ट्राइकरको भूमिकामा खटिएका म्याग्वायरले हेडरमार्फत निर्णायक गोल गर्दै खेलको अन्त्य गरे। ‘कोबी र म्याग्वायरका गोलपछिको स्टेडियमको आवाज सुन्नु मेरो जीवनकै उत्कृष्ट ध्वनि थियो। सबैले जर्सी राख्न चाहन्छन्। म त्यो आवाज राख्न चाहन्छु, त्यो नै संसारको सबैभन्दा राम्रो ध्वनि हो,’ अमोरिमले भने।
