भान डाइकले गरे लिभरपुलसँग दुई वर्षको नयाँ सम्झौता

काठमाडौं। कप्तान भर्जिल भान डाइकले लिभरपुलसँग दुई वर्षको नयाँ सम्झौता गरेका छन्। 

३३ वर्षीय डच सेन्टर–ब्याकले मोहमद सालाहपछि अनुकरण गर्दै लामो समयदेखि चलिरहेको अड्कलबाजीलाई अन्त्य गरेका हुन्। योसँगै उनले एनफिल्डमा आफ्नो बसाइ थप दुई वर्ष लम्ब्याएका छन्।

‘म धेरै खुसी छु, धेरै गर्व लागेको छ। अहिले योबारे बोल्दा मेरो मनमा धेरै भावना उम्लिरहेका छन्। यो गर्वको क्षण हो, खुसीको महसुस भइरहेको छ र यो अविश्वसनीय छ। मेरो करिअरको अहिलेसम्मको यात्रालाई हेर्दा यो क्लबसँग अझ दुई वर्ष थप गर्न पाउनु अद्भुत कुरा हो। म अत्यन्तै खुसी छु,’ उनले भने।

जनवरी २०१८ मा प्रिमियर लिग क्लब साउथह्याम्प्टनबाट आएका भान डाइकले लिभरपुललाई इङ्ल्यान्ड र युरोपको शिखरमा पुर्‍याउन महत्वपूर्ण भूमिका खेलेका छन्। उनले अहिलेसम्म क्लबका लागि ३१४ खेल खेलिसकेका छन्। यस अवधिमा उनले लिभरपुललाई प्रिमियर लिग, च्याम्पियन्स लिग, एफए कप, दुई लिग कप, युइएफए सुपर कप र क्लब विश्वकप जिताइसकेका छन्।