पहिलो सिजनमै रियलसँग च्याम्पियन्स लिग जित्ने एमबाप्पेको सपना अधुरै

काठमाडौं। किलियन एमबाप्पेले आफ्नो पहिलो सिजनमै रियल मड्रिडसँग च्याम्पियन्स लिग जित्ने सपना अधुरै छोड्नुपरेको छ।

पेरिस सेन्ट–जर्मेन (पिएसजी)बाट च्याम्पियन्स लिग जित्न उनले धेरै प्रयास गरेका थिए। तर, असफल भएपछि १५ पटकको च्याम्पियन रियलमा उपाधि जित्ने लक्ष्यसहित उनी आवद्ध भए। यद्यपि, उनले रियललाई उपाधिनजिक पुर्‍याउन सकेनन्।

स्यान्टियागो बर्नाबेउमा बुधबार सम्पन्न दोस्रो लेगमा केही समर्थकहरूले उनलाई ‘हूट’समेत गरे। बुधबार राति आर्सनलसँग २–१ को हार बेहोरेपछि रियल समग्रमा ५–१ ले पराजित हुँदै प्रतियोगिताबाट बाहिरिएको हो। पहिलो लेगमा लन्डनमा ३–० ले हारिसकेको रियलले घरेलु मैदानमा पनि नतिजा उल्टाउन सकेन।

अब आर्सनलले सेमिफाइनलमा एमबाप्पेको पूर्वक्लब पिएसजीसँग प्रतिस्पर्धा गर्नेछ। पिएसजीले मंगलबार एस्टन भिल्लालाई समग्रमा ५–४ ले हराउँदै अन्तिम चारमा स्थान बनाएको थियो।

एमबाप्पे पछिल्ला पाँच खेलमा कुनै गोल गर्न सकेका छैनन्। बुधबारको खेलमा उनले एकपटक पनि पोस्टतर्फ बल प्रहार गर्न सकेनन्। ७५औं मिनेटमा दाहिने खुट्टाको चोट बोकेपछि उनी मैदानबाट बाहिरिएका थिए। ब्राहिम डियाजले उनलाई प्रतिस्थापन गरे। दर्शकहरूले उनको नाम घोषणामा ‘हूट’ गरेका थिए।

यद्यपि, उनले आफैं हिंडेर मैदान छोडेका थिए। क्लबले चोटको गम्भीरताबारे तत्काल कुनै जानकारी दिएको छैन। २३औं मिनेटमा एमबाप्पेमाथि पेनाल्टीको सम्भावना देखिएको थियो। तर, भिएआर (भिडियो सहायक रेफ्री) को समीक्षापछि निर्णय उल्ट्याइयो। रेफ्रीले पहिला डिफेन्डरले उनलाई समातेको भन्दै पेनाल्टी दिएका थिए।

रियलका गोलरक्षक थिबाउट कोर्तोइसले आर्सनलको सशक्त रक्षात्मक रणनीतिले एमबाप्पे र भिनिसियस जुनियरलाई प्रभावहीन बनाएको बताए। ‘कहिलेकाहीँ हामीले आत्मआलोचना गर्न पनि सक्नुपर्छ। हामी एउटा समूह हौं,’ उनले भने।