काठमाडौं। कप्तान भर्जिल भ्यान डाइकको अन्तिम क्षणको गोलसँगै लिभपुल इङ्लिस प्रिमियर लिगको २०औं उपाधितर्फ अघि बढेको छ।
घरेलु मैदान एन्फिल्डमा आइतबार सम्पन्न खेलमा भ्यान डाइकले ८९औं मिनेटमा निर्णायक गोल गर्दै लिभरपुललाई वेस्ट ह्यामविरुद्ध २–१ को जित दिलाएका हुन्। लिभरपुल अब म्यानचेस्टर युनाइटेडको २० उपाधिको कीर्तिमान बराबरी गर्ने नजिक पुगेको छ। यदि बाँकी ६ मध्य दुई खेल जित्यो भने सन् २०२० पछि पहिलो प्रिमियर लिग उपाधि उचाल्ने छ।
जितसँगै आर्ने स्लटको टोलीले शीर्ष स्थानमा १३ अंकको अग्रतामा पुर्याएको छ। लिभरपुल दोस्रो स्थानमा रहेको आर्सनलले शनिबार ब्रेन्टफोर्डसँग १–१ को बराबरी खेलेको फाइदा उठाउन सफल भयो।
खेलको १८औं मिनेटमा लुइस डियाजको गोलमार्फत लिभरपुलले अग्रता लिएको थियो। मोहम्मद सालाहले उक्त गोलका लागि एसिस्ट गरे। योसँगै उनले यस सिजन लिगमा ४५ गोल र एसिस्टको कीर्तिमान बनाएका छन्। यो ३८ खेलको प्रिमियर लिग सिजनको कीर्तिमान हो।
तर, ८६औं मिनेटमा एन्ड्र्यु रोबर्टसनले आत्मघाती गोल गरेपछि खेल बराबरीमा आएको थियो। तर, भ्यान डाइकले निर्धारित खेल सकिन एक मिनेट बाँकी रहँदा हेडर गोल गर्दै निर्णायक टोलीलाई तीन महत्वपूर्ण अंक दिलाए।
सप्ताहको सुरुआतमै सालाहले क्लबसँग दुई वर्षको नयाँ सम्झौता गर्दै भविष्यप्रति स्पष्टता दिएका थिए। त्यसैले उनले सानदार प्रदर्शनको साथ सम्झौता उत्सव मनाए। उनले खेलको अन्त्यतिर मैदान छाड्दा दर्शकहरूले उभिएर सम्मान दिएका थिए।
वेस्ट ह्यामले पनि बराबरी गर्ने प्रयास गरेको थियो। पहिलो हाफमा मोहम्मद कुदुसको प्रहार बारमा लाग्यो। दोस्रो हाफमा जारोड बोवेनको प्रहार गोलकिपर एलिसनले रोकिदिए।
