सिजनको अन्त्य हुनुअघि नै हाभर्ट्ज मैदान फर्किने सम्भावना

काठमाडौं। आर्सनलका फरवार्ड काई हाभर्ट्जले सिजनको अन्त्य हुनुअघि नै चोटबाट फर्किने सम्भावना बढेको छ। योसँगै आर्सनलको च्याम्पियन्स लिग जित्न मद्दत पुग्ने भएको छ।

हाभर्ट्जले फेब्रुअरीमा दुबईमा भएको ट्रेनिङ क्याम्पको क्रममा ह्यामस्ट्रिङ चोट बोकेका थिए। त्यसपछि शल्यक्रिया गरिएको थियो। सुरूमा उनले यो सिजनका बाँकी खेल गुमाउने अनुमान गरिएको थियो।

तर, सामाजिक सञ्जालमा सार्वजनिक भएका भिडियोहरूमा हाभर्ट्जले पुनःसक्रिय अभ्यास गरिरहेको देखिएको छ। योसँगै उनी चाँडै मैदान फर्कन सक्ने आशा पलाएको छ, विशेष गरी आर्सनल च्याम्पियन्स लिग फाइनलमा पुग्न सफल भयो भने।

क्वार्टरफाइनलको पहिलो लेगमा आर्सनलले रियल मड्रिडलाई ३–० ले हराएको थियो। योसँगै आर्सनलले सेमिफाइनल पुग्ने सम्भावनालाई बलियो बनाएको छ।

मुख्यप्रशिक्षक मिकेल अर्टेटाले हाभर्ट्जको अवस्थाबारे उत्साहजनक जानकारी दिए। ‘सिजन सकिनु अघि हामी उनलाई फर्काउन सक्नेछौं भन्नेमा मलाई आश छ। प्रत्येक चोट फरक हुन्छ। उनले निकै मिहिनत गरिरहेका छन्, जतिसक्दो चाँडो फर्किन चाहन्छन्। हाम्रो मेडिकल स्टाफले पनि राम्रो काम गरिरहेका छन्,’ उनले भने।

हाभर्ट्ज र ग्याब्रियल जिसस अनुपस्थित हुँदा स्पेनका मिडफिल्डर मिकेल मेरिनोलाई स्ट्राइकरको भूमिकामा खेलाउनु परेको थियो। यस्तो अवस्थामा हाभर्ट्जको पुनरागमनले आर्सनललाई ठूलो राहत मिल्नेछ।

सन् २०२१ मा चेल्सीबाट च्याम्पियन्स लिग जितेको हाभर्ट्जले यस सिजन १७ गोल गरिसकेका छन्। केही आलोचना भए पनि उनीमा अनुभव र क्षमता प्रशस्त छ, जुन सिजनको अन्त्यतिर निर्णायक हुन सक्छ।

रियलविरुद्ध ऐतिहासिक जितपछि आर्सनलमा उत्साह छाएको छ। तर, अर्टेटाले भने,‘हामीले विशेष रात बितायौं। तर, त्यो सकियो। अब हामी पूर्ण रूपमा ब्रेन्टफोर्डविरुद्धको खेलमा केन्द्रित छौं। त्यो खेल पनि उत्कृष्ट प्रदर्शन आवश्यक पर्नेछ।’