साल्ट र कोहलीको अर्धशतक, बैंग्लुरुको सानदार जित

काठमाडौं। फिल साल्ट र विराट कोहलीको अर्धशतकसँगै रोयल च्यालेन्जर्स बैंग्लुरुले इन्डियन प्रिमियर लिग (आइपिएल) मा सानदार जितसहित विजयी सुरुआत गरेको छ।

शनिबार सम्पन्न पहिलो खेलमा कोलकाता नाइट राइडर्सलाई बैंग्लुरुले सात विकेटले पराजित गरेको हो। कोलकाताले दिएको १७५ रनको लक्ष्य पछ्याएको बैंग्लुरुले १६.२ ओभरमा तीन विकेट गुमाउँदै १७७ रन बनाएको हो।

बैंग्लुरुको जितमा कोहलीले सर्वाधिक ५९ रन बनाए। अविजित रहेका उनले ३६ बलमा चार चौका र तीन छक्का प्रहार गरे। साल्टले ३१ बलमा नौ चौका र दुई छक्कासहित ५६ रन बनाए।

देवदत्त पडिक्कल १० र कप्तान रजत पाटिदार ३४ रनमा आउट हुँदा लियम लिविगस्टन १५ रनमा अविजित रहे। कोलकाताका वैभव अरोडा, वरुण चक्रवर्ती र सुनील नारायणले समान एक विकेट लिए।

त्यसअघि इडन गार्डेनमा टस हारेर पहिला ब्याटिङ थालेको कोलकाताले निर्धारित २० ओभरमा आठ विकेट गुमाउँदै १७४ रन बनाएको थियो।

कोलकाताका कप्तान अजिक्य रहाणेले सर्वाधिक ५६ रन बनाए। ३१ बल खेलेका उनले ६ चौका र चार छक्का प्रहार गरे। सुनील २६ बलमा पाँच चौका र तीन छक्कासहित ४४ रनमा आउट हुँदा अंगकृष रघुवंशी ३० र रिन्कु सिंह १२ रनमा आउट भए।

बैंग्लुरुका क्रुणाल पण्ड्याले सर्वाधिक तीन विकेट लिए। चार ओभर बलिङ गरेका उनले २९ रन खर्चिए। जोश हेजलवुडले दुई विकेट लिँदा यश दयाल, रसिख सलाम र सुयश शर्माको नाममा समान एक विकेट रह्यो।