काठमाडौं। कुशल भुर्तेलको सानदार अलराउन्ड प्रदर्शन र ललितनारायण राजवंशीको कसिलो बलिङसँगै साबिक विजेता नेपाल पुलिस क्लबले प्रधानमन्त्री कप एकदिवसीय क्रिकेट प्रतियोगितामा अपराजित यात्रा कायमै राखेको छ।
बिहीबार सम्पन्न खेलमा पुलिसले बागमती प्रदेशलाई ९३ रनले पराजित गरेको हो। यो नतिजासँगै अपराजित रहेको पुलिसले सात खेलबाट १४ अंक पुर्याएको छ।
बागमतीको भने यो चौथो हार हो। अंक तालिकामा सातौं स्थानमा रहेको बागमतीको समान खेलबाट ६ अंक छ।
पुलिसले दिएको २९८ रनको लक्ष्य पछ्याएको बागमतीले ४५.२ ओभरमा सबै विकेट गुमाउँदै २०४ रन मात्रै बनाउन सक्यो। बागमतीलाई रोक्न ललितले सर्वाधिक चार विकेट लिए।
१० ओभर बलिङ गरेका उनले ३४ रन खर्चिए। कुशलले पनि तीन विकेट लिँदै बागमतीका ब्याटरलाई चल्न दिएनन्।
करण केसीले दुई विकेट लिँदा गुल्सनकुमार झाको नाममा एक विकेट रह्यो।
बागमतीका ईशान पाण्डेले सर्वाधिक ७० रन बनाए। ९८ बल खेलेका उनले ६ चौका प्रहार गरे। शुभ कंशाकार ३६, विपिन आचर्या २०, सूर्य तामाङ १७ र प्रतीश जिसी १४ रनमा आउट हुँदा अन्यले राम्रो प्रदर्शन गर्न सकेनन्।
त्यसअघि भैरहवास्थित एक्स्ट्रा टेक ओभलमा टस जितेर पहिला ब्याटिङ थालेको पुलिसले आठ विकेट गुमाउँदै २९७ रन बनाएका थिए।
पुलिसका ओपनर कुशलले सर्वाधिक ८८ रन बनाए। ९८ बल खेलेका उनले ११ चौका प्रहार गरे।
कप्तान दीपेन्द्रले ४६ बलमा चार चौका र तीन छक्कासहित ६० रन बनाए। अमित श्रेष्ठ ४८ र आरिफ शेख ३८ रनमा आउट भए।
बागमतीका प्रतीशले सर्वाधिक तीन विकेट लिए। १० ओभर बलिङ गरेका उनले ४६ रन बनाए।
रिजन ढकाल, ईशान पाण्डे, शंकर गजुरेल र विपिन आचर्याको नाममा समान एक विकेट रह्यो।
-1742522413.jpeg)
