नेपालसँग बदला लिन एक वर्ष प्रतीक्षा गरेको लेबनान

काठमाडौं। इन्टरनेसनल वुमेन्स च्याम्पियनसिपको कमजोर टोली किर्गिस्तानविरुद्ध १–० को कठिन जित निकालेको नेपाली टोली बिहीबार लेबनानको सामना गर्दा जितको दबाबमा हुनेछ।

पहिलो खेलमा नेपालले किर्गिस्तानविरुद्ध फराकिलो नतिजाको आश राखेको थियो। तर, १०औं मिनेटमै विमला चौधरीको गोलमार्फत सुरुआती अग्रता लिएको नेपालले त्यसपछि पाएको एक दर्जन अवसरलाई सदुपयोग गर्न सकेन।

लिग चरणमा शीर्ष दुई स्थानमा रहने टोलीले फाइनल खेल्नेछ। हालसम्मको अंक तालिकामा म्यानमार शीर्ष स्थानमा छ। गोल संख्यामा पछि परेको नेपाल भने दोस्रो स्थानमा छ।

लेबनानसँगको खेल जिते नेपालले सिधै फाइनलमा स्थान बनाउने छ। हारेको खण्डमा भने प्रतियोगिताकै बलियो मानिएको म्यानमारविरुद्ध नेपाललाई जितको विकल्प हुने छैन। त्यसैले लेबनानविरुद्धको खेलमा दबाब रहेको मुख्य प्रशिक्षक राजेन्द्र तामाङ बताउँछन्।

‘हामीलाई हार्न हुन्न भन्ने दबाब छ, लेबनानलाई भने जित्नैपर्ने दबाब छ,’ खेलअघि उनले भने। लेबनान पहिलो खेलमा म्यानमारसँग ३–१ ले पराजित भएको थियो। त्यसैले फाइनलको सम्भावना कायम राख्न लेबनानलाई नेपालविरुद्ध जितको खाँचो छ।

नेपाल र लेबनान दोस्रोपल्ट आमुन्नेसामुन्ने हुन लागेका हुन्। गत वर्ष साउदी अरबमा भएको वाफ महिला च्याम्पियनसिपको यी दुई टोलीको भेट पहिलोपल्ट भएको थियो।

सेमिफाइनलमा भएको उक्त भेटमा नेपाल २–१ ले विजयी भयो। यो खेलमा तीनवटै गोल नेपाली खेलाडीबाट भएको हो। नेपाली रक्षक पूजा रानाले गोलकिपर अञ्जिला तुम्बाप्पो सुब्बालाई बल ब्याक पास दिँदा लेबनानले सुरुआती अग्रता लिएको थियो।

तर, ७६औं मिनेटमा सावित्री भण्डारीले गोल गर्दै नेपाललाई खेलमा फर्काएकी थिइन्। बारबरीतर्फ उन्मुख खेलको अतिरिक्त समयमा मिडफिल्डर प्रीति राईले पेनाल्टी बक्स बाहिरबाट दर्शनीय गोल गर्दै नेपाललाई पुनरागमन जित दिलाइन्।

योसँगै लेबनानले लगातार दोस्रोपल्ट वाफको फाइनलमा पुग्ने अवसर गुमाएको थियो। यसपल्ट लेबनान त्यो हारको बदला लिन काठमाडौं झरेको हो। जसका लागि लेबनानले एक वर्षको प्रतीक्षा गरेको छ।
 
‘वाफमा हारेलगत्तै लेबनानले एक मैत्रीपूर्ण खेल खेलौं भनेर प्रस्ताव गरेको थियो। लेबनान नै आऊ हामी सबै खर्च बेहोर्छौं भनेको थियो,’ राजेन्द्र सम्झिन्छन्, ‘उनीहरूलाई त्यो हारले चित्त बुझेको छैन। लेबनान जतिखेर निमन्त्रणा गर्छ त्यैले आउन तयार थियो। अहिले बदला लिन आएको छ।’

लेबनान केही युवा खेलाडी लिएर काठमाडौं आइपुगेको छ। यी खेलाडीले म्यानमारविरुद्ध पहिलो गोल खाएको तीन मिनेटपछि नै टोलीलाई खेलमा पुनरागमन गराएको थियो। तर, डिफेन्समा सम्हालिन नसक्दा पहिलो खेलमा पराजय बेहोर्न पर्‍यो।

यद्यपि, लेबनान नेपालका लागि बलियो प्रतिद्वन्द्वी रहेको राजेन्द्र बताउँछन्। ‘खेल्ने स्तर हेर्दा बलियो देखिन्छ। डिफेन्सको प्रिन्सिपल, अनुशासन र अन्य कुरामा लेबनान अब्बल छ। त्यसैले हामीलाई अझै गाह्रो बनाउँछ,’ उनले भने।

वाफमा नेपालले लेबनानलाई धेरै गोलको अवसर दिएको थियो। तर, प्राप्त अवसरलाई सदुपयोग गर्न सकेन। यसपल्ट भने त्यति धेरै अवसर नदिने रणनीतिमा राजेन्द्र देखिन्छन्। त्यसैले सावित्री भण्डारी र रेखा पौडेललाई अगाडि खेलाएर यसपल्ट लेबनानलाई दबाब दिने उनको रणनीति छ। यसका लागि मिडफिल्डरले आफ्नो योजनाअनुसारको खेल प्रस्तुत गर्नुपर्ने उनी बताउँछन्।