काठमाडौं। रोबर्ट लेवान्डोस्कीको पेनाल्टी गोलसँगै बार्सिलोना स्पेनिस ला लिगाको शीर्ष स्थानमा फर्किएको छ। सोमबार राति सम्पन्न खेलमा बार्सिलोनाले रायो भालेकानोलाई १–० ले पराजित गरेको हो।
यो जितपछि बार्सिलोनाको ५१ अंक पुगेको छ। रियल मड्रिडको पनि समान अंक छ। एट्लेटिको मड्रिड ५० अंकका साथ तेस्रो स्थानमा छ।
बार्सिलोनाले यो मौका रियल र एट्लेटिकोको कमजोर प्रदर्शनको फाइदा उठाउँदै प्राप्त गरेको हो। शनिबार रियलले ओसासुना र एट्लेटिकोले सेल्टा भिगोसँग १–१ को बराबरी खेलेको थियो।
२७औं मिनेटमा पठे सिसले इनिगो मार्टिनेजलाई पेनाल्टी बक्सभित्र लडाएपछि भिडियो रेभ्युमार्फत बार्सिलोनालाई पेनाल्टी दिइएको थियो। त्यसपछि लेवान्डोस्कीले उत्कृष्ट फिनिसिङ गर्दै बल जाली चुमाए।
बार्सिलोनाका लामिन यामालले राम्रो अवसर पाएका थिए। तर, रायोका गोलरक्षक अगस्टो बटाल्लाले उत्कृष्ट बचाउ गरे। त्यस्तैऽ रायोका जोर्जे डे फ्रुटोसले गोल गरेका थिए तर अफसाइडका कारण मान्यता पाउन सकेन।
रायोका लागि डे फ्रुटोस खेलभरि खतरनाक देखिए। तर, दोस्रो हाफमा बार्सिलोनाले खेल आफ्नो नियन्त्रणमा लियो। यो जितसँगै बार्सिलोनाले अपराजित यात्रा १२ खेलमा पुर्याएको छ।
यस हारसँगै रायोको डिसेम्बर ७ देखि कायम रहेको ९ खेलको अपराजित यात्रा समाप्त भएको छ।
