टिमको अवस्था हेरेर सावित्रा मैदान उत्रिने

काठमाडौं। नेपाली राष्ट्रिय टोलीकी स्टार स्टाइकर सावित्रा भण्डारी ‘साम्बा’ले टिमको अवस्था हेरर आफू मैदान उत्रिने या नउत्रिने टुंगो लगाउने बताएकी छन्।

नेपालले त्रिपुरेश्वरस्थित दशरथ रंगशालामा सोमबार साँझ किर्गिस्तानसँग प्रतिस्पर्धा गर्दैछ। यो खेल ६ बजे हुनेछ। तर, उनी आज बिहान नै स्वदेश फर्किएकी हुन्।

‘होटेल गएपछि थाहा हुन्छ। मेरो शरिरले के माग्छ, कोचको के निर्णय हुन्छ र मेरो टोलीले मैदानमा कस्तो प्रदर्शन गर्छ त्यसमा भर पर्छ,’ उनले भनिन्।

फ्रान्सको शीर्ष श्रेणी क्लब अभान्ट ग्वेन्ग्याम्पबाट लिग खेलिरहेकी उनी शनिबार साबिक विजेता लियोनविरुद्ध मैदान उत्रिएकी थिइन्।

उक्त खेलमा ग्वेन्ग्याम्प ७–० ले पराजित भएसँगै क्लबले उनलाई रिलिज गरेको हो। उनी आइतबार नै नेपाल प्रस्थान गरेकी थिइन्। तर, लामो यात्रा र छोटो विश्रामका कारण उनलाई पहिलो खेल आराम दिने सम्भावना प्रबल रहेको देखिन्छ।