काठमाडौं । चौथो संस्करणको महिला साफ च्याम्पियनसिप नेपालमा आयोजना हुदैछ । फागुन २८ देखि चैत ८ गतेसम्म विराटनगरमा हुने प्रतियोगिताको तयारीमा नेपाली टिम व्यस्त छ ।
ललितपुरको सातदोबाटोस्थित एन्फाको कृतिम मैदानमा नेपाली टिमले अहिले तयारी गरिरहेको छ । महिला साफ नेपालले पहिलो पटक आयोजना गर्न लागेको हो । आयोजक नेपाल समूह 'ए'मा छ ।
नेपाल रहेको समूहमा भुटान पाकिस्तान र बंगलादेश छन् । प्रतियोगिताको पहिलो खेलमा नेपालले भुटान, दोस्रोमा पाकिस्तान र तेस्रोमा बंगलादेशसंग खेल्नेछ ।
मुख्य प्रशिक्षक हरि खड्काले २३ सदस्यीय महिला टिमको घोषणा समेत गरिसकेका छन् । यही टिमबाट अन्तिम २० सदस्यीय टोलीको छनोट हुनेछ । त्यस अगाडी नेपालले भारतमा एक अन्तराष्ट्रिय प्रतियोगिता र थाईल्याण्ड लगायतका देशमा केही मैत्रिपुर्ण खेल खेल्नेछ ।
घरेलु मैदानमा हुन लागेको साफलाई आयोजना र उपाधिको हिसाबले सफलतापुर्वक सम्पन्न गर्ने नेपालले लक्ष्य लिएको छ । भर्खरै नेपाल ओलम्पिकको प्रारम्भिक छनोट खेलेर फर्किएको छ । छनोट खेलमा नेपालले गरेको प्रर्दशनले मुख्य प्रशिक्षक हरि खड्का उत्साहित छन् ।
साफको तयारीमा व्यस्त रहेका मुख्य प्रशिक्षक खड्कासंग साफमा नेपालमा लक्ष्य र तयारीका बिषयमा खेलापाटीका रमेश सुबेदीले कुराकानी गरेका छन् ।
साफको तयारी कस्तो भईरहेको छ ?
समय राम्रो पाएको छौ । सुरुवातबाट ३४ खेलाडी क्याम्पमा राखेर अभ्यास सुरु गर्यौ । चार हप्ताको ‘स्ट्रेन्थ’ ट्रेनिङ सकिएको छ । तयारीमा रहदाँ भारतमा अन्तराष्ट्रिय प्रतियोगिता खेल्न गईरहेका छौ । अबको तयारी टेक्निकल रुपमा हुनेछ । ओलम्पिक छनोटका देखिएको कमजोरी सुधार गर्ने कोशिश गरिरहेको छु ।
साफमा नेपालको मुख्य लक्ष्य के हुनेछ ?
कुनै पनि टिम प्रतियोगितामा सहभागी भएपछि उपाधि जित्ने लक्ष्य राख्छ । प्रशिक्षकले समेत टिमको जिम्मेवारी लिएपछि उपाधिनै चाहन्छ । हामीले सोही अनुसार काम गरिरहेका छौँ ।
खेलाडीले सोही अनुसार तयारी र मेहनत गरिरहेको छन् । घरेलु मैदानमा प्रतियोगिता हुने भएकाले हामीलाई केही सुविधा समेत छ । तर खेलाडीले घरेलु मैदानमा समर्थकबाट कत्तिको दबाब महशुश गर्छन् भन्ने नै मुख्य चुनौती हो । सबै मैले सिकाईरहेको छु । पहिलो पटक साफ नेपालमा हुँदैछ । खेलाडीको मेहनतले राम्रो नतिजा ल्याउँछ जस्तो लाग्छ ।
घरेलु भुमिमा नेपालले उपाधि जित्ने सम्भावना कति छ ?
सम्भावना पहिले देखिनै हो । साफ जहिलेबाट खेल्यौ, त्यही समयबाट च्याम्पियन बन्ने सम्भावना हो । भारतले दक्षिण एसियामा एकछत्र राज गर्दै आएको छ । भारत टेक्निकल र ट्याक्टिकल नेपाल भन्दा माथिको टिम हो । अहिले बंगलादेश माथि आईरहेको छ ।
तर,जसरी हामीले म्यानमारमा प्रदर्शन गर्याै, सम्भावना बढेको देखेको छु । म्यानमारमा हामीले भारतलाई दबाबमै राखेका खेलेका हौ । खेलाडीले जस्तो प्रदर्शन गरे, म एकदमै आशाबादी छु ।
साफ राष्ट्रमा नेपाली महिला फुटबलको स्तर कस्तो हो ?
भारत हामी भन्दा माथि छ । तर नेपालको महिला टिम सुधारिएको देख्छु । बंगलादेश पनि बिस्तारै माथि आईरहेको छ । साफमा नेपाल भारत र बंगलादेशकै राम्रो स्थिती छ ।
साफमा नेपालको मुख्य तगारो भारत बन्दै आएको छ । यसपटक भारतलाई हराउने हाम्रो योजना के हुनेछ ?
फुटबलमा जबसम्म गोल गरिदैन, तबसम्म जितिदैन । नहार्नलाई गोल गर्नुहुन्न भन्ने दुबै पक्ष छ । फरवार्ड लाईनबाट आएको खेलाडी र प्रशिक्षकको हिसाबमा आक्रमक फुटबलमा बिश्वास गर्छु । टिम हेरेर रणनीति बनाउनेछु ।
पछिल्लो समय हामीले भारतविरुद्व आक्रमक फुटबल खेल्यौ । त्यसमा हामीले तीन अवसर समेत पाएका थियौ । हामी दबाबमा आएर खेल्ने छैनौ । हाम्रो सबल पक्षलाई सदुपयोग गर्दै खेल्नेछौ ।
पछिल्ला समय नेपाली महिला फुटबलले प्राप्त गरेको सफलताले साफमा कस्तो प्रभाव पार्ला ?
आत्मविश्वासको बिषय प्रधान बनेर आउँछ । म्यानमारमा भारतसंग खेल्नु अगाडी जस्तो आत्मविश्वासको कमी देखेका थिए । हामीले आत्मविश्वास जोगाउने कोशिश गर्यौ । नतिजा हाम्रा अगाडी देखिन्छ । खेलाडीले जसरी खेले, त्यसले आत्मविश्वास भरिदिएको छ । त्यही हाम्रो राम्रो पक्ष हो जस्तो लाग्छ । पटक पटक भारतसंग निरास हुदाँ जुन मनोभाव खेलाडीमा थियो, उनीहरु त्यसबाट बाहिर आएका छन् । यसले नतिजामा पक्कै प्रभाव पार्नेछ ।
महिला टिमको पहिलो पटक नेतृत्व गर्नुभएको छ । ओलम्पिकको पहिलो चरणको छनोटमा सफल हुनुभएको छ । साफको दबाब कत्तिको छ ?
दबाब अवश्य नै हुन्छ । टिमलाई पहिलो बनाउन एकदमै दबाब हुन्छ । अझ घरेलु मैदानमा प्रतियोगिता आयोजना हुदैछ । म्यानमारबाट आएपछि नेपालको आश पलाएको छ ।
नेपाली महिला टिमले केही गर्छ भन्ने आश पलाएको छ । त्यही आशलाई कायम राखेर मेहेनत समेत गरिरहेका छौ । अब राम्रो नतिजाको आश गर्न सक्छौ ।
