‘इन्टरनेसनल वुमेन्स च्याम्पियनसिप’ बाट दुई करोडभन्दा बढी कमाउँदै एन्फा !

काठमाडौं। अखिल नेपाल फुटबल संघ (एन्फा) ले इन्टरनेसनल वुमेन्स च्याम्पियनसिपबाट दुई करोडभन्दा बढी कमाउने भएको छ।

फागुन ५ गतेदेखि त्रिपुरेश्वरस्थित दशरथ रंगशालामा हुने प्रतियोगिताको टेलिभिजन ब्रोडकास्टिङ, मार्केटिङ, टिकेटिङ र डिजिटल राइट्स ब्रान्ड डिजिटल लोजिक प्रालिलाई एन्फाले प्रदान गरिसकेको छ। 

प्रतियोगितामा नेपालसहित म्यानमार, कीर्गिस्तान र लेबनानले सहभागिता जनाउने छन्। एन्फा प्रवक्ता सुरेश शाहका अनुसार छुट्टाछुटै टेन्डरमार्फत राइट्स बिक्री गरिएको हो। 

‘टिकट एक करोड ३५ लाखमा बेचेका हौं। ब्रोडकास्टिङ र मार्केटिङलगायत अन्य राइट्स भने ६६ लाख ६ सय ६६ मा बेचेका हौं,’ उनले भने। गत कात्तिकमा यही मैदानमा भएको साफ महिला च्याम्पियनसिप २०२४ को टिकेटिङ राइट्स एन्फाले माउन्ट एभरेस्ट स्पोर्ट्स एन्ड इभेन्ट्स प्रालिले टेन्डर प्रक्रियामार्फत ८० लाख रुपैयाँमा बेचेको थियो।

एन्फाले टेलिभिजन ब्रोडकास्टिङ, मार्केटिङ र डिजिटल राइट्स भने एडी रिलिजलाई २५ लाख रुपैयाँमा बिक्री गरेको थियो। यसरी समग्रमा एन्फाले साफबाट समग्रमा एक करोड सात लाख रुपैयाँ कमाउने निश्चित थियो। 

तर, नेपाल फाइनलमा पुगेपछि एन्फाले माउन्ट एभरेस्टबाट टिकट बिक्रीको अधिकार खोसेको थियो। आफैंले टिकट बिक्री गरे पनि कति रकम संकलन भयो भन्नेबारे खुलाएको थिएन।

यसपल्ट भने एन्फाले ५० प्रतिशत लिइसकेको प्रवक्ता शाहले बताए। बाँकी रकमको चेक पनि एन्फाले लिइसकेको उनले बताए।