हीरा, दीपा र अमिषाले ‘इन्टरनेसनल वुमेन्स च्याम्पियनसिप’ गुमाउने

काठमाडौं। नेपाली राष्ट्रिय टोलीका तीन मुख्य खेलाडीले घरेलु मैदानमा हुने ‘इन्टरनेसनल वुमेन्स च्याम्पियनसिप’ गुमाउने भएका छन्। 

नेपालले त्रिपुरेश्वरस्थित दशरथ रंगशालामा फागुन ४ गतेदेखि प्रतियोगिता खेल्दैछ। तर, साढे तीन महिनापछि अन्तर्राष्ट्रिय खेलमा फर्किएको नेपालले डिफेन्डर हीराकुमारी भुजेल, मिडफिल्डर दीपा शाही र फरवार्ड अमिषा कार्कीलाई गुमाउने भएको हो।

मुख्यप्रशिक्षक राजेन्द्र तामाङका अनुसार हीरा र दीपा चोटमुक्त नभएको कारण टोलीमा हुने छैनन्। यस्तै, अमिषाले भने व्यक्तिगत कारणले यो प्रतियोगिता गुमाउने छिन्।

‘हीरा र दीपा घाइते छन्। अमिषा पनि टोलीमा हुनेछैनन्। त्यसैले यी तीन स्थानमा नयाँ खेलाडी खेलाउन पर्ने बाध्यता नै छ,’ राजेन्द्रले खेलपाटीसँग भने। यद्यपि, को खेलाउने भन्ने टुंगो केही दिनमा लाग्ने उनले जानकारी दिए।

साफ महिला च्याम्पियनसिप २०२४ अन्तर्गत कार्तिक २ गते दशरथ रंगशालामा भुटानविरुद्ध भएको पहिलो खेलमा हीरा र दीपा घाइते भएका थिए। एमआरआइ रिपोर्टमा हीरालाई एसिएल र एमसिएल इन्ज्युरी भएको पाइएको थियो भने दीपालाई एसिएल इन्ज्युरी भएको देखिएको थियो। त्यसपछि दुवैलाई कार्तिक ४ गते हस्पिटल भर्ना गरिएको थियो। दुवैको शल्यक्रिया कार्तिक ७ गते गरिएको थियो।

यी दुई खेलाडी कार्तिक २१ गते ‘डिस्चार्ज’ भएका थिए। तर, चोटबाट ‘रिकभर’ हुन फिजियोथेरापी गराइरहेका छन्। यी दुई खेलाडीलाई प्रतिस्पर्धात्मक खेलमा फर्किन अझै चार महिनाभन्दा बढी समय लाग्ने बताइएको छ।

अमिषा भने ‘लेफ्टिनेन्ट’को प्रशिक्षणमा भक्तपुरमा छिन्। यसअघि उनले यसैको तयारी गर्दै गर्दा एन्फा महिला लिगका केही खेल पनि गुमाएकी थिइन्। 

अनुभवी डिफेन्डर हीरा र उदीयमान ‘प्लेमेकर’ दीपालाई चोटको कारण गुमाएपछि उनीहरूको अभाव नेपाली टोलीमा प्रष्टै देखिएको थियो। भुटानविरुद्ध सबैभन्दा खराब नतिजाको रूपमा गोलरहित खेलेपछि नेपाल माल्दिभ्सलाई ११–० र श्रीलंकालाई ६–० ले पराजित गर्दै समूह विजेता भएको थियो।

तनावपूर्ण सेमिफाइनलमा भारतलाई १–१ पछि टाइब्रेकरमा पन्छाएको नेपाली टोली उपाधि होडमा बंगलादेशविरुद्ध २–१ ले हारेको थियो।