राखेपका नवनियुक्त पदाधिकारीलाई मोटर स्पोर्ट्सको बधाई 

काठमाडौं । नेपाल अटोमोबाईल एसोसियसन (नासा नेपाल)को एथलिट कमिसनले राष्ट्रिय खेलकुद परिषदका नवनियुक्त पदाधिकारीलाई बधाई दिएको छ ।

शुक्रबार काठमाडौंमा एक कार्यक्रमको आयोजना गरेर नासा नेपालको एथलिट कमिसनले राखेपका नवनियुक्त पदाधिकारीलाई स्वागत सहित बधाई दिएको हो । 

खेलकुद मन्त्री तेजुलाल चौधरी, एफआईए वर्ल्ड काउन्सिल मेम्बर गोविन्द भट्टराई र नासा नेपालका अध्यक्ष दशरथ रिसालले राखेपमा आएका नयाँ पदाधिकारीलाई बधाई पत्र प्रदान गर्दै कार्यकाल सफलताको शुभकामना दिएका थिए । 

राखेप उपाध्यक्ष धुव्र आचार्य सहित बोर्ड सदस्यहरु सुवर्णकेशरी श्रेष्ठ, रन्जना प्रधान श्रेष्ठ, नन्दा बस्याल, रामचन्द्र श्रेष्ठ, हिमालकुमार श्रेष्ठ, जगत धामीलाई नासा नेपालले बधाई सहित शुभकामना प्रदान गरेको हो । 

कार्यक्रममा पूर्व बोर्ड सदस्य समेत रहेका अल्पाईन स्पोर्ट्स फेडेरेसनका गोबिन्द भट्टराईले नेपालको शहासीक तथा पर्यटकीय खेलकुदको सम्भावना, चुनौती र अहिलेको अवस्थाका विषयमा प्रस्तुती राखेका थिए । 

नासा नेपालका उपाध्यक्ष अनिल कुमार बरालले संस्थाको वार्षिक कार्यक्रमको विषयमा जानकारी गराएका थिए । 

कार्यक्रममा एफआईए मोटर स्पोर्ट्स गेम्समा सहभागी नेपाली खेलाडीलाई समेत मन्त्री चौधरी र उपाध्यक्ष आचार्यद्धारा प्रसंशा पत्र प्रदान गरिएको थियो ।

प्रतियोगितामा सहभागी खेलाडीहरु कृष्ण पौडेल, दिप्रश शाक्य र प्रज्ञा कँडेललाई संघको तर्फबाट प्रशंसा पत्र प्रदान गरिएको हो ।

कार्यक्रमका मुख्य अतिथी खेलकुद मन्त्री चाैधरीले गत महिना सम्पन्न माउन्ट एभरेस्ट मोटर स्पोर्ट्स फेस्टिवलकाे मुख्य प्रमोटर टोटल इनर्जिज नेपालका प्रतिनिधिलाई प्रसंशा पत्र प्रदान गरेेका थिए ।