सुबर्ण र भानु कार्यकारी बोर्ड सदस्य नियुक्त 

काठमाडौं । राष्ट्रिय खेलकुद परिषदको बोर्ड बैठकले सुबर्ण श्रेष्ठ र भानु चन्दलाई कार्यकारी सदस्यमा नियुक्त गरेको छ । 

मंगलबार बसेको राखेप बोर्ड बैठकले श्रेष्ठ र चन्दलाई कार्यकारी बोर्ड सदस्यमा नियुक्त गरेको हो ।

मदन भण्डारी स्पोर्ट्स फाउन्डेसनकी प्रभावशाली नेतृत्व सुबर्णलाई एमालेले कार्यकारी सदस्यको रुपमा सिफारिस गरेको हो । यसअघि सुबर्ण राखेपको बोर्ड सदस्यको रुपमा काम गरिसकेकी छिन् । उनी नेपाल हक्की संघको महासचिव समेत हुन् ।

एमालेभित्र खेलकुदमा महिला नेतृको रुपमा प्रभावशाली देखिएकी सुबर्णले कार्यकारी सदस्यको रुपमा राखेपमा जिम्मेवारी पाएकी छिन् । 

यस्तै कांग्रेस कोटाबाट बोर्ड सदस्यमा आएका भानु चन्द समेत कार्यकारी सदस्यमा आएका छन् । पाटी सभापति शेरबहादुर देउवा निकटका भानुलाई कार्यकारी सदस्यमा नियुक्त गर्न मन्त्री चौधरीले दबाब झेल्दै आएका थिए ।

सोमबारमात्र आफ्नै स्कुल नाइटिङ्गेलकी प्रिन्सिपल रन्जना प्रधानलाई बोर्ड सदस्य बनाएर विवादमा आएका चौधरीले चन्दलाई कार्यकारीमा ल्याएका छन् । 

राखेपका सात सदस्यीय कार्यकारी समितिमा यसअघिनै कमल भट्टराई कार्यकारी सदस्यमा नियुक्त भैसकेका छन् । सोमबारमात्र मनोनित गरिएकी मन्त्री निकटकी प्रिन्सिपल रन्जना प्रधान कार्यकारी सदस्य बन्ने चर्चा छ । 

खेलकुद विकास ऐनले राखेपको कार्यकारी समिति ७ सदस्यीय रहने व्यवस्था गरेको छ । जसमा दुई पुरुष र दुई महिला गरी चार जना मनोनित हुने व्यवस्था छ । दुई जना राखेपले र दुई जना अध्यक्षको हैसियतले खेलकुद मन्त्रीले मनोनित गर्न पाउँछन् ।

सदस्य सचिव कार्यकारी रहने समितिमा राखेपका प्रशासन विभाग प्रमुख र मन्त्रालयको खेलकुद महाशाखा प्रमुख पदेन सदस्य रहने व्यवस्था ऐनले गरेको छ ।