सिन्धुपाल्चोक। दोस्रो संस्करणको प्रवीण घले स्मृति कप खुल्ला सेभेन ‘ए’ साइड फुटबल प्रतियोगिताको २४ गतेबाट सुरु हुने भएको छ।
लिल फङ (घले समाज) सिन्धुपाल्चोकको आयोजनामा हुने प्रतियोगिता पुस २४ देखि माघ १ गतेसम्म सञ्चालन हुने भएको हो।
प्रतियोगिताको विजेताले नगद १ लाख ६० हजार पाउने छ भने उपविजेताले ८० हजार पाउने छ। प्रतियोगिताको पुरस्कार राशि गत वर्षको तुलनामा करिब ९ हजार रुपैयाँले बढी हो।
गत संस्करण रोयल फेमिलीले चौताराले टाइव्रेकरमा बाह्रदेवी युवा क्लब बाह्रबिसेलाई ३–२ गोलले स्तब्ध पार्दै प्रतियोगिताको उपाधि जितेको थियो।
यस्तै, प्रतियोगितामा टिम दर्ताको लागि पुस २० गते अन्तिम मिति तोकिएको छ। टिम दर्ताको लागि ७ हजार ५०० रुपैयाँ लाग्ने छ भने प्रतियोगिता अवधिभर सहभागी टिमका खेलाडीको बिमा पनि रहने आयोजकले जनाएको छ।
प्रतियोगिताका सबै खेल सदरमुकाम चौतारास्थित मिनी रंगाशालामा सञ्चालन हुनेछ। प्रतियोगितामा जम्मा १६ टिम सहभागी गराउने आयोजकले जनाएको छ।
