काठमाडौं। इङ्लिस प्रिमियर लिग फुटबलमा शीर्ष स्थानमा रहेको लिभरपुलले शनिबार फुलह्यामसँग २–२ गोलको बराबरी खेलेको छ। लगातार दोस्रो खेलमा अंक बाँडेसँगै लिभरपुलको अग्रता कमजोर हुँदै गएको छ।
लिभरपुलले आफ्नो अघिल्लो खेलमा न्युक्यासलसँग ३–३ गोलको बराबरी खेलेको थियो। यसरी लगातार अंक बाँड्नुपर्दा लिभरपुलको शीर्ष स्थानमा अन्य टोलीहरूले चुनौती दिने स्थितिमा आएको छ।
शीर्ष स्थानको लिभरपुलको १५ खेलबाट ३६ अंक छ। जुन दोस्रो स्थानको चेल्सीभन्दा पाँच अंक मात्रै बढी हो। एन्डी रोबर्टसनले खेलको १७औं मिनेटमा रातो कार्ड खाएर टोली संकटमा पारेको थियो। तर, ८६औं मिनेटमा डियोगो जोटाले महत्त्वपूर्ण बराबरी गोल फर्काएपछि लिभरपुल कम्तीमा एक अंक सुरक्षित गर्न सफल भयो। प्रशिक्षक अर्ने स्लटले यस परिणामप्रति आफ्नो असन्तुष्टि जनाउँदै भने, ‘खेलाडीसँग मैले थप अपेक्षा गर्न सक्दैनथें।’
फुलह्यामका लागि ११औं मिनेटमा एन्ड्रियास पेरेराले गोल गर्दै टोलीलाई अग्रता दिलाए। तर, ६ मिनेटपछि ह्यारी विल्सनले गोल गर्ने प्रमुख मौका गुमाए। दोस्रो हाफमा लिभरपुलले उच्च प्रदर्शन गर्दै ५४औं मिनेटमा कोडी गाक्पोको गोलमार्फत खेल बराबरीमा ल्यायो। मोहम्मद सालाहको उत्कृष्ट क्रसलाई सदुपयोग गर्दै गाक्पोले आफ्नो टोलीलाई खेलमा फर्काए।
तर, फुलह्यामका सब्स्टिच्युट रोड्रिगो मुनिजले ७६औं मिनेटमा गोल गर्दै फुलह्यामलाई फेरि अग्रता दिलाए। त्यसपछि डार्विन नुनेजको पासमा दौडेर डियोगो जोटाले आफ्नो उत्कृष्ट फिनिशमार्फत ८६औं मिनेटमा खेल बराबरी गरे।
-1734258564.jpg)
