फाल्गुनन्द गोल्डकपमा ‘ए’ डिभिजनका चारसहित १० टोलीले प्रतिस्पर्धा गर्ने

पाँचथर। ११औं संस्करणको फाल्गुनन्द गोल्डकप फुटबल प्रतियोगितामा ‘ए’ डिभिजनका चार क्लबसहित १० टोलीले प्रतिस्पर्धा गर्ने भएका छन्।

पाँचथरको सदरमुकाम फिदिममा आयोजना हुँदै आएको प्रतियोगिता पुस ६ देखि १५ गतेसम्म सञ्चालन हुने तय छ। यस गोल्डकपको १०औं संस्करण २०७५ सालमा सञ्चालन भएको थियो। त्यसपछि फिदिम माविको खेल मैदान पुनर्निर्माण साथै कोरोना महामारी कारण गोल्डकप सञ्चालन हुन सकेको थिएन। रोकिएको ६ वर्षपछि गोल्डकप सञ्चालन हुन लागेको हो। 

प्रतियोगितामा ‘ए’ डिभिजन क्लब न्युरोड टिम (एनआरटी) मछिन्द्र, चर्च बोइज युनाइटेड र त्रिभुवन आर्मी क्लबले सहभागिता जनाउनेछन्। यस्तै, ‘बी’ डिभिजनको चित्लाङ फुटबल क्लब, विराटनगर सिटी, सिराहाको सलहेश फुटबल क्लब, न्युस्टार क्लब सुनसरी, झापा फुटबल क्लब र आयोजक फिदिम स्पोर्टिङ क्लबले गोल्डकपमा ‘ए’ डिभिजनका क्लबविरुद्ध चुनौती पेस गर्नेछन्।

फिदिम माविको खेल मैदानमा सञ्चालन हुने गोल्डकपको विजेताले उपाधिसहित १० लाख पाँच सय ५५ रुपैयाँ प्राप्त गर्नेछ। उपविजेताले पाँच लाख पाँच सय ५५ रुपैयाँ पाउने आयोजक फिदिम स्पोर्टिङ क्लबका अध्यक्ष दीपेन्द्र थापामगरले जानकारी दिए।

गोल्डकपको ११ औं संस्करणमा पुरस्कार राशि दोब्बरभन्दा बढी वृद्धि गरिएको हो। १०औं संस्करणमा विजेताले चार लाख ४४ हजार र उपविजेता हुने टोलीले दुई लाख २२ हजार प्राप्त गरेका थिए। यो पुरस्कार राशि पाँचथर जिल्लामा आयोजना हुने गोल्डकपमध्येको सर्वाधिक हो।

प्रतियोगिताको सर्वोकृष्ट खेलाडीले एक थान इभि स्कुटर प्राप्त गर्ने छन्। प्रत्येक खेलमा म्यान अफ द म्याच हुने खेलाडीले १० हजार रुपैयाँ प्राप्त गर्ने छन्। सर्वाधिक गोलकर्ताले १५ हजार रुपैयाँ प्राप्त गर्ने छन्। उत्कृष्ट रक्षक, प्रशिक्षक, फरवार्ड, मिडफिल्डर, गोलरक्षक र उदीयमान खेलाडीले जनही १०/१० हजार रुपैयाँ पाउनेछन्।

गोल्डकप सञ्चालनको लागि चार हजार दर्शक अट्ने क्षमताको बाँसको अस्थायी पारापिट निर्माणको काम लागि चलिरहेको छ। गोल्डकपमा ९० लाख रुपैयाँ खर्च हुने अनुमान गरिएको छ।