काठमाडौं। सविनकुमार लुङ्गेली मगरको दुई गोलप्रेरित संकटा फुटबल क्लबले ललित स्मृति एन्फा यु–१८ युथ लिगको अंक तालिकामा दोस्रो स्थान हासिल गरेको छ । सोमबार सातदोबाटोस्थित एन्फा कम्प्लेक्समा सम्पन्न खेलमा संकटाले चर्च बोइज युनाइटेडलाई ३–१ ले पराजित गर्दै आफ्नो अपराजित यात्रा चार खेलमा लम्ब्याएको हो ।
संकटाले पछिल्लो पटक विभागीय टोली सशस्त्र प्रहरी बल (एपिएफ) सँग २–० को हार बेहोरेको थियो । त्यसपछि टोलीले मच्छिन्द्र फुटबल क्लबलाई ४–२, मनाङ मर्स्याङ्दी क्लबलाई ४–१ र पुलिस क्लबलाई २–० ले पराजित गर्दै आफ्नो प्रदर्शन सुधार गरेको हो ।
यो जितसँगै संकटा १४ खेलबाट २७ अंक जोड्दै तालिकाको शीर्ष स्थानमा रहेको न्युरोड टिम (एनआरटी) भन्दा एक अंकले मात्र पछि छ । अर्कोतर्फ, सातौं हार बेहोरेको चर्च बोइज १५ अंकसहित नवौं स्थानमा छ ।
खेलको सुरुआतमा संकटाका कृष्णबहादुर आलेले दोस्रो मिनेटमै कर्नर बललाई हेडरमार्फत जाली चुमाउँदै टोलीलाई अग्रता दिलाएका थिए । त्यसपछि खेलको २५औं मिनेटमा सविनले एकराज विश्वकर्माको लामो पासमा उत्कृष्ट गोल गर्दै संकटाको अग्रता दोब्बर बनाए ।
दोस्रो हाफमा ५२औं मिनेटमा मनिष थापाको आउट स्विङ फ्रिकक बलमा सविनले व्यक्तिगत दोस्रो गोल गर्दै संकटाको जित सुनिश्चित गरे । चर्च बोइजका निमा पाख्रिन लामाले ६७औं मिनेटमा गोल गरे पनि टोलीको हार टार्न सकेन ।
इन्ज्युरी समयमा संकटकाका प्रज्ज्वलप्रताप क्षेत्रीले दोहोरो पहेंलो कार्ड खाँदै मैदान छाडे पनि त्यसले संकटाको जितमा कुनै असर पार्न सकेन । अर्को खेलमा सातदोबाटो युथ क्लबले मच्छिन्द्रसँग १–१ को बराबरी खेलेको छ । खेलको सुरुआतमा सातदोबाटोका तेन्जिङ तामाङले १०औं मिनेटमा गोल गर्दै टोलीलाई अग्रता दिलाएका थिए । तर, खेल सकिन १५ मिनेट बाँकी रहँदा मच्छिन्द्रका प्रसून तामाङले बराबरी गोल फर्काउँदै टोलीलाई हारबाट बचाए ।
यो बराबरीसँगै सातदोबाटो १४ खेलबाट पाँच अंक जोड्दै १२औं स्थानमा छ भने मच्छिन्द्र २३ अंकसहित तालिकाको पाँचौं स्थानमा यथावत छ ।
