उपाधि जित्न नेपाललाई १७२ रनको लक्ष्य

काठमाडौं । हङकङ टी ट्वान्टी क्रिकेट सिरिजको उपाधि जित्न पीएनजीले नेपाललाई १ सय ७२ रनको लक्ष्य प्रस्तुत गरेको छ । 

बुधबार पहिले ब्याटिङ्ग गरेको पीएनजीले ८ विकेटको क्षतिमा १ सय ७१ रन बनाएको छ । 
 

ओपनर टोनी उराले ६१ रनको शानदार इनिङ्स खेल्दै पीएनजीलाई राम्रो सुरुवात दिलाएका थिए । अन्य ब्याट्सम्यानले खासै गतिलो प्रर्दशन गर्न सकेनन् ।

पुछारका एली नाओले अविजित ३० रनको योगदान गरे । १० बल खेलेका उनले ३ छक्का र १ चौकाको मदतले सो रन बनाए ।

हिरी हिरीले १४, हिला भारेले १८, चाड सोपरले १३ र किप्लिन डोरिगाले १४ रन जोडे । अन्य ब्याट्सम्यानले दोहोरो अंकको स्कोर छुन सकेनन् ।

नेपालले ४३ रनमा ४ विकेट लिएर पीएनजीलाई दबाबमा राखेको थियो । आकाश चन्द र कुशल भुर्तेलले समान ३ विकेट लिएको खेलमा करन केसी र गुलसन झाले समान एक एक विकेट झारेका थिए । 

घरेलु टोली हङकङलाई पछि पार्दै नेपाल र पीएनजीले फाइनल सम्म पुगेका हुन् । 

नेपाल र हङकङ बीचको पहिलो खेल वर्षाले प्रभावित बनेपछि दुवै टिमले समान एक एक अंक बाँडेका थिए ।

नेपालले समूह चरणको खेलमा पीएनजीलाई ८५ रनले हराएको थियो । पीएनजीले भने हङकङलाई १० विकेटले हराएको थियो । 

नेपाल युवा खेलाडीलाई समावेश गर्दै हङकङ यात्रामा निस्किएको हो । यस वर्ष टी ट्वान्टी विश्वकप खेल्न लागेको नेपालले टी ट्वान्टी भ्रमण-सिरिजलाई प्राथमिकतामा राखेको छ ।