काठमाडौं । राष्ट्रिय खेलकुद परिषद (राखेप) ले प्रधानमन्त्री पुष्पकमल दाहाल प्रचण्डले सन्दीप लामिछानेसँग हात मिलाएको विषयमा अतिरन्जित गरिएकोमा ध्यानाकर्षण भएको जनाएको छ ।
राखेपले आइतबार एक विज्ञप्ति निकाल्दै राखेपका संरक्षक प्रधानमन्त्रीले हात मिलाएको बिषयलाई अतिरन्जनापूर्ण तवरबाट उछाल्ने कार्य भएको र सन्दीपसँग मात्र भेटघाट गरेको जस्तै अर्थ लाग्ने गरि भएको प्रचारप्रति ध्यानाकर्षण भएको जनाएको छ ।
आईसीसी क्रिकेट विश्वकप क्रिकेट लिग टू अन्तर्गतको त्रिकोणात्मक सिरिजमा क्लिन स्विप गरेपछि नेपाली टोलीलाई बालुवाटारमा बधाई दिने क्रममा प्रधानमन्त्रीले सन्दीपसँग पनि हात मिलाएका थिए ।
तर, बलात्कारको आरोप लागेका सन्दीपलाई माला लगाइदिएर हात मिलाएको भन्दै प्रधानमन्त्रीको आलोचना भइरहेको छ ।
'नेपाल क्रिकेट संघले राष्ट्रिय टिममा समावेश गरि खेलाईएका खेलाडी सन्दिप लामिछाने संग राष्ट्रिय खेलकुद परिषदका संरक्षक प्रधानमन्त्रीज्यूले हात मिलाएको बिषयलाई अतिरन्जनापूर्ण तवरबाट उछाल्ने कार्य भएको र सन्दिपलाई मात्र प्रधानमन्त्रीज्यूले भेटघाट गरेको जस्तै अर्थ लाग्ने गरि भएको प्रचारप्रति राष्ट्रिय खेलकुद परिषदको ध्यानाकर्षण भएको छ । क्रिकेटमा ऐतिहासिक सफलता पाएको टीमलाई बधाई दिने कार्यको अन्यथा अर्थ लाग्ने गरि भएको प्रचार प्रति खेलकुद परिषद दुःख व्यक्त गर्दछ,' सदस्य सचिव टंकलाला घिसिङले जारी गरेको विज्ञप्तिमा उल्लेख छ ।
नेपाली खेलाडीहरुलाई प्रोत्साहन गर्ने प्रधानमन्त्रीले सदासयता गरेको भन्दै परिषदले आभार व्यक्त गरेको छ । यस्तै राखेपले खेलकुद र खेलाडीको प्रर्वद्धन र विकासका लागि सदाझै सबै पक्षको सकारात्मक सहभागिताका लागि अनुरोध गरेको छ ।
