काठमाडौं । पाहुना टोली अस्ट्रेलियाका अलराउण्डर क्यामरुन ग्रिनले भारतविरुद्धको पहिलो टेस्ट नखेल्ने अस्ट्रेलियाका उपकप्तान स्टिभ स्मिथले संकेत गरेका छन् ।
बिहीबारदेखि नागपुरमा सुरु हुने भारतविरुद्धको पहिलो टेस्टमा ग्रिनको खेल्ने सम्भावना कम रहेको छ ।
नागपुरमा भएको अभ्यास सत्रमा ग्रिनले ब्याटिङ गरेका थिएनन् । यस अघि नै औलाको समस्याका कारण ग्रिनले बलिङ नगर्ने स्पष्ट भईसकेको थियो ।
घरेलु मैदानमा भएको दक्षिण अफ्रिकाविरुद्धको बक्सिङ डे टेस्टका क्रममा उनको औंला भाँचिएको थियो ।
अस्ट्रेलियाका उपकप्तान स्मिथले ग्रिनको खेल्ने सम्भावना कम रहेको बताएका छन् ।
'मलाई लाग्दैन कि उनी खेल्नेछन् । उनले अहिलेसम्म तीव्र गतिका बलरको सामना पनि गरेका छन् । त्यसैले म यती भन्न सक्छु कि उसले खेल्ने छैन तर यो पक्का भने भईसकेको छैन । हामी पर्ख र हेरमा रहेका छौ ।' स्मिथले भने
यदी ग्रिनले पहिलो टेस्ट गुमाएमा नागपुर टेस्ट गुमाउने उनी तेस्रो अस्ट्रेलियन बन्नेछन् । यस अघि नै मिचेल स्टार्क र जोस हेजलउडले खेल गुमाउने पक्का भईसकेको छ ।
