काठमाडौं । पहिलो संस्करणको वुमन्स प्रिमियर लिग (डब्लुपीएल) को अक्सनमा नेपालका पाँच खेलाडीले नाम दर्ता गराएका छन् ।
भारतीय क्रिकेट बोर्ड (बीसीसीआई)ले आयोजना गर्न लागेको डब्लुपीएको अक्सनमा नेपालका पाँच खेलाडीले नाम दर्ता गराएका हुन् ।
नेपाली राष्ट्रिय क्रिकेट टोलीकी कप्तान रुबिना क्षेत्री, अलराउण्डर तथा पूर्व उपकप्तान सीता रानामगर, अलराउण्डर कविता कुँवर, तिव्र गतिकी बलर अश्मिना कर्माचार्य र ब्याटर तथा उपकप्तान इन्दु बर्माले अक्सनका लागि नाम दर्ता गराएका छन् ।
पाँच नेपाली खेलाडी सहित अक्सनका लागि १५ सय खेलाडीले नाम दर्ता गराएका छन् । डब्लुपीएलको अक्सनका लागि खेलाडीको अन्तिम सूची यसै साता सार्वजनिक गरिने बीसीसीआईले जानकारी दिएको छ ।
बीसीसीआईका अनुसार १३ फेब्रुअरीमा डब्लुपीएको खेलाडी अक्सन हुनेछ । खेलाडी अक्सन भारतको मुम्बई शहरमा हुनेछ ।
प्रत्येक टोलीमा एक जना एसोसिएट टोलीका खेलाडी रहनु पर्ने नियमका कारण नेपाली खेलाडीको बिक्ने सम्भावना रहेको छ ।
अक्सनमा अधिकतम ९० खेलाडीमा बोली लाग्नेछ । पाँच टोली रहेको डब्लुपीएलमा एक टोलीले न्युनतम १५ देखि अधिकतम १८ जनासम्म खेलाडी अनुबन्ध गर्न पाउने छ ।
दक्षिण अफ्रिकामा हुने महिला टी–ट्वान्टी विश्वकपको फाइनल भएको छ दिनपछि डब्लुपीएल सुरु हुनेछ ।
केही साता अघि डब्लुपीएलका पाँच टोली बीसीसीआईले ४६६९.९९ करोड भारतीय रुपैयामा बिभिन्न कम्पनीलाई बिक्रि गरेको थियो ।
