काठमाडौं । नेपाली राष्ट्रिय क्रिकेट टिमका मुख्य प्रशिक्षक मोन्टी देशाईले आफु धेरै उदेश्य लिएर नेपाल आएको बताएका छन् ।
नेपाल क्रिकेट संघ (क्यान) ले सोमबार आयोजना गरेको कार्यक्रममा बोल्दै मुख्य प्रशिक्षक देशाईले नेपालसँगको सम्बन्ध लामो भएको उल्लेख गर्दै आफु धेरै उदेश्यसहित आएको बताए ।
क्यानले भारतीय प्रशिक्षक देशाईलाई दुई वर्षको लागि मुख्य प्रशिक्षक नियुक्त गरेको हो । क्यानले सोमबार एक कार्यक्रमको आयोजना गर्दै औपचारिक रुपमा देशाईलाई मुख्य प्रशिक्षक नियुक्त गरिएको जनाएको थियो ।
राष्ट्रिय खेलकुद परिषद (राखेप) र खेलकुद मन्त्रालयले स्वीकृति दिएपछि क्यानले देशाईलाई सार्वजनिक गरेको हो ।
'मेरो यात्रा भनेको फरक ठाउमा जानको लागि हो । यहाँ म धेरै उद्देश्य लिएर आएको हुँ । नेपाल क्रिकेटसँगको मेरो सम्बन्ध लामो छ । म २०१२ देखि जोडिएको छु,' देशाईले भने, 'मुख्य प्रशिक्षकको पद स्वीकार गर्न पाउँदा मेरो लागि सम्मान हो र उत्साहित छु ।'
देशाईले सन् २०१७ मा नेपाली यू–१९ पुरुष राष्ट्रिय क्रिकेट टिमका ब्याटिङ कन्सल्ट्यान्ट भएका थिए । त्यस भन्दा अगाडी देशाईले सन् २०१५ को आईसीसी टी–ट्वान्टी विश्वकप छनोटका क्रममा राष्ट्रिय क्रिकेट टिमका लागि काम गरेका थिए ।
प्रशिक्षक देशाईले नेपाली टोलीको ड्रेसिङ रुम खुशी बनाउने आफ्नो लक्ष्य रहेको समेत बताए ।
'मेरो दिमागमा आएको एउटै कुरा भनेको ड्रेसिङ रुम खुशी बनाउनु हो जुन मेरो कोचिङ दर्शन हो । वातावरण निर्माण गर्नु हो । हामी गर्व गर्ने कथा निर्माण गर्नेछौ,' उनले थपे ।
क्यानले मुख्य प्रशिक्षकका लागि अन्तिम चरणमा छनोट भएका ५ प्रशिक्षकको अन्तरवार्ता लिएको थियो । मुख्य प्रशिक्षकका लागि २४ जनाले आवेदन दिएका थिए ।
मुख्य प्रशिक्षक मनोज प्रभाकरले राजीनामा दिएपछि नेपाली टोली मुख्य प्रशिक्षक विहीन रहेको थियो ।
