काठमाडौं । पाकिस्तानका विकेटकिपर ब्याटर मोहम्मद रिजवान सन्दीप लामिछानेलाई भेट्ने मुख्य उद्देश्यका साथ नेपाल आएका छन् ।
नेपाली राष्ट्रिय टिमका पूर्व कप्तान सन्दीप लामिछानेलाई भेट्ने मुख्य उद्देश्यका साथ रिजवान आईतबार नेपाल आएका हुन् ।
लामो समय पछि नेपाली टोलीमा फर्किएका सन्दीपलाई भेट्न रिजवान आइतबार नेपाल आएका नेपाल क्रिकेट संघ (क्यान) का उच्च स्रोतले खेलपाटीलाई जानकारी दिए ।
स्रोतका अनुसार रिजवानले सन्दीपलाई आइतबार नै भेटेर हौसला तथा मनोबल बढाएका छन् ।
रिजवानले सोमबार बिहान नेपाली राष्ट्रिय क्रिकेट टोलीका सदस्यहरु तथा क्यानका अध्यक्षलाई समेत भेटेका छन् ।
स्रोतका अनुसार रिजवान आज नै पाकिस्तान फर्किनेछन् ।
टी-ट्वान्टी अन्तराष्ट्रिय ब्याटिङ तर्फको वरियतामा दोस्रो स्थानमा रहेका रिजवानले लगातार उत्कृष्ट प्रदर्शन गर्दै आएका छन् ।
३० वर्षीय रिजवानले ८० टी-ट्वान्टी अन्तराष्ट्रियमा १ शतक र २३ अर्धशतकसहित २ हजार ६ सय ३५ रन बनाएका छन् । ५२ एकदिवसीय अन्तराष्ट्रियमा २ शतक ८ अर्धशतक सहित १ हजार २ सय ४७ रन बनाएका छन् ।
२७ टेस्ट खेलेका रिजवानले १ हजार ३ सय ७३ रन बनाएका छन् ।
हाल सन्दीप नेपाली टोलीको बन्द प्रशिक्षणमा रहेका छन् । नेपालले आईसीसी विश्वकप क्रिकेट लिग–टू अन्तर्गत नेपालमा हुने त्रिकोणात्मक सिरिजको लागि तयारीमा रहेको छ ।
नेपाल, नामिबिया र स्कटल्याण्ड सम्मिलित सिरिज आउँदो फागुन २ गतेदेखि सुरु हुनेछ ।
पोखरामा मंगलबार बसेको क्यान बोर्ड बैठकले सन्दीपको निलम्बन फुकुवा गर्ने निर्णय गरेको थियो ।
एक नाबालिकलाई बलात्कारको आरोप लागेपछि क्यानले सन्दीपलाई निलम्बन गरेको थियो ।
क्यानले गत भदौ २३ गते सन्दीपलाई निलम्बन गरेको थियो । सन्दीपविरुद्धको बलात्कार मुद्दा जिल्ला अदालत काठमाडौंमा विचाराधीन अवस्थामा छ ।
गत पुस २८ गते उच्च अदालत पाटनले सन्दीपलाई २० लाख धरौटीमा छाड्न आदेश दिएको थियो । सन्दीप पुस १९ गते धरौटी बुझाएर थुनामुक्त भएका थिए।
एक नाबालिकालाई बलात्कार गरेको अभियोगमा जिल्ला अदालत काठमाडौंले उनलाई पुर्पक्षका लागि थुनामा पठाएको थियो । जिल्ला अदालतको आदेशविरुद्ध सन्दीपले उच्च अदालत पाटनमा पुनरावेदन गरेका थिए ।
सन्दीपविरुद्ध गत भदौ २१ गते प्रहरी बृत्त गौशालामा एक बालिकालाई बलात्कार गरेको भन्दै उजुरी परेको थियो । भदौ २३ गते काठमाडौं जिल्ला अदालतले सन्दीपविरुद्ध पक्राउ पुर्जी जारी गरेको थियो ।
सन्दीप गत असोज २० गते त्रिभुवन अन्तराष्ट्रिय विमानस्थलबाट पक्राउ परेका थिए ।
