एजेन्सी । आईसीसी महिला टी–ट्वान्टी विश्वकपको ८ औं संस्करण २०२३ फेब्रुअरी १० देखि दक्षिण अफ्रिकामा सुरु हुँदैछ।
दक्षिण अफ्रिकामा आयोजना हुने आठौं संस्करणको आईसीसी महिला टी–ट्वान्टी विश्वकपमा १० टोलीले सहभागीता जनाउदै छन् ।
यस संस्करणको विश्वकपको पहिलो खेलमा आयोजक दक्षिण अफ्रिका र श्रीलंकाबीचमा खेल हुँदैछ ।
महिला टी-ट्वान्टी विश्वकपको सुरुआत २००९ बाट भएको थियो । पहिलो संस्करणको महिला टी–ट्वान्टी विश्वकप इंग्ल्याण्डमा आयोजना भएको थियो ।
पहिलो संस्करणको विश्वकपमा आयोजक इंग्ल्याण्ड,भारत,पाकिस्तान,अस्ट्रेलिया,न्युजिल्याण्ड,दक्षिण अफ्रिका,वेस्ट इण्डिज तथा श्रीलंकाको सहभागीता रहेको थियो ।
यो विश्वकपमा भारत र आयोजक इंग्ल्याण्डबीचमा पहिलो खेल भएको थियो । पहिलो खेल आयोजकले १० विकेटको फराकिलो अन्तरमा जितेको थियो ।
यस प्रतियोगितामा समूह 'ए' बाट न्युजिल्याण्ड र अस्ट्रेलिया तथा समूह 'बी' बाट आयोजक इंग्ल्याण्ड र भारत सेमिफाईनल प्रवेश गरेका थिए ।
सेमिफाईनलमा अस्ट्रेलियालाई पराजित गरेको आयोजक र भारतलाई पराजित गरेको न्युजिल्याण्ड बीचमा खेल भएको थियो ।
पहिलो संस्करणको विश्वकपमा न्युजिल्याण्डलाई ६ विकेटले पराजित गरि आयोजक इंग्ल्याण्डले उपाधी जितेको थियो ।
पहिलो संस्करणको प्रतियोगितामा इंग्ल्याण्ड अपराजित रहँदै च्याम्पियन भएको थियो ।
यस विश्वकपमा इंग्ल्याण्डकी क्लेयर टेलर 'प्लेयर अफ द टुर्नामेन्ट' बनेकी थिईन् ।
