काठमाडौं । सप्तरीको राजविराजमा जारि चौंथो संस्करणको मिथिला कप टी-ट्वान्टी अन्तर्गत पाँचौ दिन मंगलबार बजाज युथ क्रिकेट क्लब विजयी भएको छ ।
बजाजले डिफेन्डिङ च्याम्पियन युनाइटेड क्रिकेट क्लब पर्सालाई ५ रनले पराजित गरेको हो ।
बिस्नुपुरस्थित महेन्द्र विन्देश्वरी मल्टिपल कलेज टियु मैदानमा सम्पन्न खेलमा बजाज युथ क्लब सप्तरीले दिएको ११४ रनको लक्ष्य पछ्याएको युनाइटेड क्रिकेट क्लब पर्साले निर्धारित २० ओभरमा ८ विकेट क्षतिमा १०८ रन मात्र बनायो।
युनाइटेडको लागि यु-१९ राष्ट्रिय क्रिकेटर समेत रहेका सन्तोष कार्कीले ३८ रन बनाएता पनि जित्न पर्याप्त रहेन । अल्फाज मन्सुरीले २५, सम्साद मन्सुरीले २३ रन बनाए।
बलिङतर्फ बजाजका मोहम्मद हुसेन एक्लैले ४ विकेट लिए । उनले ४ ओभरमा २२ रन खर्चिए। देब्रे हाते फास्ट बलर हुसेन प्लेयर अफ द म्याच घोषित भए।
त्यस्तै बिपिन खत्री, मिकु मण्डल र अभय मण्डलले १/१ विकेट लिए ।
त्यस अघि टस जितेर ब्याटिङ गरेको बजाज युथ सप्तरीले २० ओभरमा ८ विकेटको क्षतिमा ११३ रन बनाएको थियो । उसको लागि पपु यादवले सर्वाधिक २५ रन, बिपिन खत्रीले २० रन, मोहम्मद हुसेनले १२ तथा सन्दिप क्षेत्रीले १० रन योगदान दिए । अतिरिक्तको रुपमा उसले १७ रन पायो।
युनाइटेड पर्साका बलर संसाद मन्सुरीले ३, सैफुल्लाह अन्सारी र सम्साद अन्सारीले २/२ तथा ब्यास यादवले १ विकेट लिए।
प्रतियोगिता अन्तर्गत शुक्रबार दोश्रो क्वार्टरफाइनलमा एफसीसी सुनसरी र बिवाईए सप्तरी प्रतिस्पर्धा गर्नेछन् ।
युवा शक्ति क्लबद्वारा आयोजित नक-आउट प्रतियोगितामा १६ टोलि सहभागी छन्। प्रतियोगिताको विजेताले एक लाख रुपैयाँ प्राप्त गर्नेछ।
