काठमाडौं । नेपाल क्रिकेट संघ (क्यान) ले दोस्रो चरणको बन्द प्रशिक्षणका लागि पूर्व कप्तान सन्दीप लामिछानेलाई समेट्दै टिम घोषणा गरेको छ ।
यसअघिको २८ सदस्यीय टोलीबाट १० जना हटाएर र सन्दीप लामिछाने र प्रतिश जिसीलाई थपेर २० सदस्यीय टिम घोषणा गरिएको हो ।
नेपाली टोलीले आईसीसी विश्वकप क्रिकेट लिग–टू अन्तर्गत नेपालमा हुने त्रिकोणात्मक सिरिजको लागि तयारीमा रहेको छ ।
नेपाल, नामिबिया र स्कटल्याण्ड सम्मिलित सिरिज आउँदो फागुन २ गतेदेखि सुरु हुनेछ । सोही सिरिजका लागि २८ सदस्यीय प्रारम्भिक टोली घोषणा भएको थियो ।
सिरिजको पहिलो खेलमा नेपालले नामिबियासँग खेल्नेछ । जुन खेल फेब्रुअरी १४ मा हुनेछ । यस्तै नेपालले दोस्रो खेलमा स्कटल्याण्डसँग फेब्रुअरी १७ मा खेल्नेछ । नेपालले फेब्रुअरी १८ मा नामिबियासँग दोस्रो खेल खेल्दा स्कटल्याण्डसँग फेब्रुअरी २१ मा पुन: खेल्नेछ ।
यस अघिका २८ जनाको टोलीमा सन्दीप र प्रतिश थिएनन् । दोस्रो चरणमा कूल २० खेलाडी राख्दा २ नयाँ खेलाडी थपिए भने पहिलो चरणबाट १० खेलाडी बाहिरिएका छन् ।
नेपाल टी-ट्वान्टी लिगमा प्रतिशले पोखरा एभेन्जर्सबाट खेल्दै बलिङ र ब्याटिङ दुबै उत्कृष्ट प्रदर्शन गरेका थिए ।
तीव्र गतिका बलर प्रतिश तल्लोक्रममा ठूला सट खेल्ने गर्दछन् । बागमातीबाट घरेलु क्रिकेट खेल्ने प्रतिशले नेपालको यू-१६ र यू-१९ टोली खेलि सकेका छन् ।
दोस्रो चरणमा सन्दीप र प्रतिशसँगै कप्तान रोहित पौडेल,कुशल भुर्तेल,आसिफ शेख,ज्ञानेन्द्र मल्ल, कुशल मल्ल,आरिफ शेख,दीपेन्द्र सिंह ऐरी,गुलशन झा,करण केसी,ललित नारायण राजवंशी,सन्दीप जोरा,भिम सार्की,कमल सिंह ऐरी,किशोर महतो,मौषम ढकाल,सूर्य तामाङ,सोमपाल कामी,अर्जुन साउद छन् ।
शरद भेषावकर,विनोद भण्डारी,सिद्धान्त लोहनी,अभिनाश बोहरा,विवेक यादव,अनिल साह,विक्रम सोब,भुवन कार्की,अंकित सुवेदी र सागर ढकाल भने बाहिरिएका छन् ।
एक नाबालिकलाई बलात्कारको आरोप लागेपछि क्यानले सन्दीपलाई निलम्बन गरेको थियो । तर, पोखरामा मंगलबार बसेको क्यान बोर्ड बैठकले मुद्दाको किनारा नलाग्दै सन्दीपको निलम्बन फुकुवा गर्ने निर्णय गरेको थियो ।
क्यानले गत भदौ २३ गते सन्दीपलाई निलम्बन गरेको थियो । सन्दीपविरुद्धको बलात्कार मुद्दा जिल्ला अदालत काठमाडौंमा विचाराधीन अवस्थामा छ ।
गत पुस २८ गते उच्च अदालत पाटनले सन्दीपलाई २० लाख धरौटीमा छाड्न आदेश दिएको थियो । सन्दीप पुस १९ गते धरौटी बुझाएर थुनामुक्त भएका थिए।
