काठमाडौं । नेपाल क्रिकेट संघ (क्यान) को खेलाडी वर्गीकरण समितीका सदस्य दीपेन्द्र चौधरीले खेलाडीको मापदण्ड नपुगेको कारण कम महिला क्रिकेट खेलाडीलाई केन्द्रीय करार सम्झौतामा राखिएको बताएका छन् ।
क्यानले बुधबार सार्वजनिक गरेको केन्द्रीय करार सम्झौतामा १२ महिला खेलाडी अटाएका थिए ।
'हामीले एउटा मापदण्ड बनाएका थियौं । त्यो मापदण्डमा मेल खाने ९ जना खेलाडी मात्र थिए,' चौधरीले खेलपाटीसँग भने '९ जनालाई मात्र सम्झौतामा राख्दा नराम्रो सन्देश जाने भएकोले हामीले संख्या बढाएर १२ पुराएका हौँ।'
महिला खेलाडीको केन्द्रीय करारमा गत वर्ष १८ खेलाडी समेटिएका थिए ।
क्यानको महिला खेलाडी वर्गीकरण टी-ट्वान्टी अन्तराष्ट्रियलाई मुख्य आधार रहने चौधरीले बताए ।
'खेलाडी वर्गीकरणको मुख्य आधार कति टी-ट्वान्टी अन्तराष्ट्रिय खेल खेल्नी भन्नेछ । गत वर्ष हामीले कम मात्र टी-ट्वान्टी अन्तराष्ट्रिय खेल्यौ,' उनले भने 'यसै कारण सम्झौतामा कम खेलाडी समेटिएका हुन् । करारमा धेरै जना खेलाडी भन्दा पनि खेलाडीको तत्कालिन प्रदर्शन हेरेर प्रोत्साहन रकम दिनु भनेर हामीले क्यानमा सिफारिस गरेका छौं ।'
महिलातर्फको 'ए' श्रेणीमा रुबिना क्षेत्री, सीता राना मगर र इन्दु बर्मा रहेका छन् ।
त्यस्तै 'बी' श्रेणीमा काजोल श्रेष्ठ,अस्मिना कर्माचार्य र कविता कुवँर रहदा 'सी' श्रेणीमा कविता जोशी बिन्दु रावल,संगिता राई,ममता चौधरी,ज्योती पाण्डे र अप्सरी बेगम रहेका छन् ।
