तेस्रो जितसँगै पुलिस सेमिफाइनलमा

काठमाडौं । विभागीय टोली नेपाल पुलिस क्लबले पीएम कप एकदिवसीय पुरुष क्रिकेटमा लगातार तेस्रो जित निकालेको छ ।

कीर्तिपुरस्थित टियु मैदानमा बिहीबार लुम्बिनी प्रदेशलाई ६ विकेटले हराउँदै पुलिसले अपराजित यात्रा कायम राखेको हो ।

यस जितसँगै पुलिस सेमिफाइनलमा समेत प्रवेश गरेको छ ।

लुम्बिनीले दिएको १ सय ८९ रनको लक्ष्य पुलिसले ३७ ओभर १ बलमा ४ विकेट गुमाएर १ सय ९२ रन जोड्दै पूरा गर्यो।

पुलिसको जितमा दीपेन्द्र सिंह ऐरीले अविजित रहदै सर्वाधिक ४३ रन बनाए ।

आरिफ शेखले ३५ रन बनाए ।  यस्तै सुनिल धमलाले ३६ रन जोड्दा कुशल भुर्तेलले ३२ तथा अमित श्रेष्ठले २८ रन बनाए ।

लुम्बिनीका अनिल खरेलले २ तथा दुर्गेश गुप्ता र मुहमद हुसेनले १/१ विकेट लिए ।

त्यसअघि टस जितेर पहिले ब्याटिङ गरेको लुम्बिनीले ४४ ओभर २ बलमा अलआउट हुँदै १ सय ८८ रन बनाएको थियो।

लुम्बिनीका लागि कप्तान देव खनालले ७४ रनको अर्धशतकीय इनिङ खेले ।

विशाल बिक्रम केसीले ३० रन जोड्दा प्रज्वल थापाले २३ रन बनाए । दुर्गेश थापा र मोहमद हुसेनले समान ११/ ११ रन बनाए ।

पुलिसका दीपेन्द्र सिंह ऐरीले ४ विकेट लिए ।  सागर ढकाल र करण केसीले २/२ विकेट लिए ।

जितसँगै पुलिसले ३ खेलमा ६ अंक जोडेको छ ।

पुलिस समूह 'बी' को शीर्ष स्थानमा रहेको छ ।

लुम्बिनी २ खेलमा २ अंक जोडेर दोस्रो स्थानमा रहेको छ ।