काठमाडौं । नवौं राष्ट्रिय खेलकद प्रतियोगिता अन्तर्गतको महिला क्रिकेट प्रतियोगितामा बागमती प्रदेशले समूह 'ए' को उपबिजेताको रुपमा सेमिफाइनलमा प्रवेश गरेको छ ।
पोखरामा रंगशालामा आइतबार भएको खेलमा मधेश प्रदेशलाई ८ विकेटले पराजित गर्दै बागमतीले सेमिफाइनलमा स्थान बनाएको हो ।
मधेश प्रदेशले दिएको ५५ रनको लक्ष्य बागमती प्रदेशले १३ ओभर २ बलमा ८ विकेट गुमाएर पूरा गर्यो । बागमतीको जितमा सुमन खतिवडाले अविजित १७ तथा अनिशा मजाकोटीले अविजित १६ रन बनाईन् । अस्मिता खरेलले १३ रन जोड्दा कंचन श्रेष्ठले ५ रन बनाईन् ।
मधेसका लागि सरस्वती चौधरी र कप्तान कविता गौतमले समान १/१ विकेट लिए ।
त्यस अघि पहिले ब्याटिङ गरेको मधेसले १८ दशमलब २ ओभरमा अलआउट हुदै ५४ रन बनायो । मधेशका लागि कुनै पनि ब्याटरले दोहोरो अंकमा रन बनाउन सकेनन् । बागमतीले १९ रन अतिरिक्तका रुपमा खर्चियो ।
बागमतीका लागि विपिशा शाही,सोनी पाख्रिन र खुसी डंगोलले २/२ विकेट लिए ।
समूह 'ए' मा रहेको बागमती ४ खेलमा ६ अंकका साथ उपबिजेताका रुपमा सेमिफाइनल पुगेको हो । मधेस भने ४ खेलमा ४ अंकका साथ प्रतियोगिताबाट बाहिरिएको छ ।
यस समूहबाट पुलिस क्लब समूह बिजेताका रुपमा सेमिफाईनल पुगिसकेको छ । महिला क्रिकेटमा ९ टोलीको सहभागिता रहेको छ ।
सोमबार हुने पहिलो सेमिफाइनलमा समूह 'ए' को बिजेता नेपाल एपीएफ क्लब र समूह 'बी' को उपबिजेता लुम्बिनी प्रदेशबीच खेल हुनेछ । दोस्रो सेमिफाइनलमा समूह 'बी' को बिजेता नेपाल पुलिस र समूह 'ए' को उपबिजेता बागमती प्रदेशबीच खेल हुनेछ ।
