नवौं राष्ट्रिय : जितका बाबजुत प्रदेश एक बाहिरियो

काठमाडौं । नवौं राष्ट्रिय खेलकद प्रतियोगिता अन्तर्गतको महिला क्रिकेट प्रतियोगितामा प्रदेश एकले पहिलो जित हात पारेको छ ।

पोखरामा शुक्रबार भएको खेलमा प्रदेश एकले कर्णाली प्रदेशलाई ७ विकेटले पराजित गरेको छ । कर्णालीले दिएको ५४ रनको लक्ष्य प्रदेश एकले ६ ओभर ४ बलमा ३ विकेट गुमाउँदै पूरा गर्यो ।

प्रदेश एकको जितमा निशा शाहले १८ रन जोड्दा लकिता राजवंशीले अविजित १४ रन बनाईन् । नमिता श्रेष्ठ ८ रनमा अविजित रहिन् । कर्णालीका लागि यमुना थारु र अन्जु गुरुङले समान १/१ विकेट लिए ।

त्यस अघि पहिले ब्याटिङ गरेको कर्णालीले १६ दशमलब १ ओभरमा अलआउट हुँदै ५३ रन जोडेको थियो । उसका लागि यमुना थारुले २१ रन जोड्दा कप्तान बिना थापाले ११ रन बनाईन् । अन्य कुनै पनि ब्याटरले दोहोरो अंकमा रन बनाउन सकेनन् । कर्णालीका ३ ब्याटर डगआउट भए ।

प्रदेश एकका लागि लकिता राजबंशीले ४ तथा अलिसा खडायतले ३ विकेट लिईन् । जितका बाबजुत प्रदेश एक समान ३ अंकमा रहे पनि लुम्बिनी प्रदेश भन्दा पछि रहेकोले समूह चरणबाट नै बाहिरियो । लुम्बिनी भने उपबिजेताका रुपमा सेमिफाईनल पुग्यो । कर्णाली जित बिहिन रहदै बाहिरियो ।

यस समूहबाट समूह बिजेताका रुपमा पुलिस क्लब सेमिफाईनल पुगिसकेको छ । महिला क्रिकेटमा ९ टोलीको सहभागिता रहेको छ । सहभागी टोलीलाई दुई समूहमा विभाजन गरिएको छ ।

समूहको शीर्ष दुई टोलीले सेमिफाइनलमा स्थान बनाउने छन् ।

समूह 'ए' मा एपीएफ क्लब, मधेश प्रदेश, गण्डकी प्रदेश,सुदुरपश्चिम प्रदेश र बागमती प्रदेश रहेको छ ।

समूह 'बी' मा नेपाल पुलिस क्लब, कर्णाली प्रदेश, प्रदेश-१ र लुम्बिनी प्रदेश रहेको छ ।