खाली हात फर्कने छैनौँ - कप्तान रुबिना

काठमाडौं । नेपाली राष्ट्रिय महिला क्रिकेट टिमकी कप्तान रुबिना क्षेत्रीले मलेसियामा आयोजना हुने एसीसी महिला टी-ट्वान्टी च्याम्पियनसिपको उपाधि जित्नेमा आफुलाई विश्वास रहेको बताएकी छिन्  ।

त्रिवि क्रिकेट मैदानमा शनिबार संचारकर्मीसँग कुरा गर्दै कप्तान रुबिनाले च्याम्पियनसिपको उपाधि जित्नु चुनौती रहेको तर टोलीलाई खाली हात फिर्ता नल्याउने बताएकी छिन् ।

'मेरो लागि पनि चुनौती छ । आफ्नो प्रदर्शन पनि माथि गर्नु पर्नेछ र यो टिमलाई खाली हात फिर्ता नगर्नु भन्ने छ,' कप्तान रुबिनाले भनिन् ।

कप्तान रुबिनाले यस पटक टिमका सबै खेलाडीलाई केहि गर्नु पर्छ भन्ने भावना रहेको समेत बताईन् ।

'लामो समय भयो महिला क्रिकेटमा ट्रफी ल्याउन सकेको छैन । त्यसको दुख हामीलाई लागेको छ,' कप्तान रुबिनाले भनिन्, 'यस पटक एकजना मात्र हैन सबैजना नेतृत्व गरेर खेल्छु भन्ने भावना देखिएको छ । त्यो पहिले कमी थियो ।'

च्याम्पियनसिप यहिँ जुन १७ बाट सुरु हुनेछ । च्याम्पियनसिपमा नेपाल समूह 'बी' मा रहेको छ । नेपालको समूहमा हङकङ, कुवेत, भुटान र बहराइन रहेका छन् ।

च्याम्पियनसिपको फाइनल पुग्ने दुई टोलीले महिला टी-ट्वान्टी एसिया कप क्रिकेटमा छनोट हुनेछ ।

कप्तान रुबिनाले यस पटक टोलीलाई उपाधि जित्ने र एसिया कप पुग्ने मौका रहेको समेत बताईन् ।

'हामीले खेलेको हरेक प्रतियोगिता महत्वपूर्ण हुन्छ । हरेक प्रतियोगिताबाट हामीले सिकिरहेका हुन्छौं, कसरि आफुलाई विकास गर्ने कसरी टिमलाई ब्यालेन्स भनेर,' रुबिनाले थपिन, 'अहिलेको प्रतियोगितामा हामीलाई मौका छ । अहिले हामीसँग भएको स्रोतलाई प्रयोग गरेर तयारी गरिरहेका छौँ ।'

यस्तै रुबिनाले युगान्डाविरुद्धको घरेलु सिरिज टिमका लागि महत्वपूर्ण साविक भएको बताईन् ।

'युगान्डाविरुद्धको सिरिज हाम्रो लागि महत्वपूर्ण भयो । हामी कुन स्तरमा छौँ, हामीले कुन चिजमा काम गर्नुपर्ने रैछ । हामीले युगान्डाविरुद्धको सिरिजपछि १० दिन फिल्डिङ र फिटनेसमा काम गर्यौं,' रुबिनाले भनिन् ।

कप्तान रुबिनाले मलेसियाको विकेट एकदमै फरक रहेको र त्यहाँको दुइ विकेटमा सेट हुनका लागि अध्ययन गरिरहेको बताईन् ।

च्याम्पियनसिपका लागि नेपाल क्रिकेट संघ (क्यान) ले प्रारम्भिक महिला क्रिकेट टिमको घोषणा गरिसकेको छ ।

क्यानले प्रारम्भिक चरणमा १९ सदस्सीय टिमको घोषणा गरेको हो ।

च्याम्पियनसिपमा नेपालले भुटानसँग खेल्दै प्रतियोगिताको सुरुआत गर्नेछ । खेल जुन १७ मा हुनेछ।

यस्तै नेपालले दोस्रो खेलमा जुन १८ मा कुवेतसँग खेल्नेछ ।

नेपालले जुन २० मा बहराइन र जुन २१ मा हङकङसँग खेल्नेछ ।

समूह चरणको खेलपछि शीर्ष दुई टोलीले सेमिफाइनलमा स्थान बनाउने छन् ।

प्रारम्भिक नेपाली टोली -

रुविना क्षेत्री, इन्दु वर्मा, सिता रानामगर, ज्योती पाण्डे, काजल श्रेष्ठ, कविता कुँवर, अपसरी बेगम, कबिता जोशी, डोली भट्ट, सबनम राई, सरिता मगर, रोमा थापा, संगिता राई, अस्मिता कर्मचार्य, मनिषा उपाध्याय, विन्दु रावल, ममता चौधरी, रेखा रावल, इश्वरी विष्ट