‘जोस’ अर्थात जस बटलर

काठमाडौं । यसपल्टको इन्डियन प्रिमियर लिग (आईपीएल) मा कोही एक खेलाडी आफ्नो खेल जीवनकै उत्कृष्ट लयबाट गुज्रिरहेका छन् भने ती हुन्, इंग्लिस ब्याट्र जस बटलर । उनको प्रदर्शनबाट निकै प्रभावित हुनेमा एक रहेका छन्, सचिन तेन्दुलकर । बटलरले भर्खरै तेस्रो शतक बनाए र त्यस लगतै तेन्दुलकरले उनलाई उल्लेख गर्दै ट्विट गर्दै खालि एक शब्द लेखे, ‘जोस’ । अर्थात केही गरेर देखाउने शक्ति ।

आईपीएलका एकै संस्करणमा तीन शतक बनाएपछि उनले के पनि सिद्ध गरेका छन् अहिले तत्कालका लागि ट्वान्टी ट्वान्टी क्रिकेटमा उनी जत्तिको ब्याटर छैन् । राजस्थान रोयल्सका लागि उनले दिल्लीविरुद्धको खेलमा ६५ बलमै १ सय १६ रन बनाए । यसपल्ट उनले समग्रमा ४ सय ९१ रन बनाइ सके, जसमा अन्य दुई शतक पनि पर्छन् । उनी अब एकै सिजन विराट कोहलीले बनाएको कीर्तिमान ९ सय १३ रनलाई पछ्याइरहेका छन् ।

संयोगले अहिले लय गुमाएका कोहलीले त्यो प्रदर्शन सन् २०१६ मा गरेका थिए । आफ्नो प्रदर्शनलाई लिएर बटलको प्रतिक्रिया रहेको छ, ‘मलाई लाग्छ, म आफ्नो खेल जीवनकै उत्कृष्ट लयमा छुं र यसलाई कायम राख्न चाहन्छुं ।’ खासै धेरै बोल्न नरूचाउने ३१ वर्षीय बटलरले १७ वर्षको किशोर छँदा एकपल्ट २ सय २७ रन बनाएर नटआउट रहेका थिए, स्कुल क्रिकेटमा । त्यसयता उनले लामो बाटो तय गरिसके । 

धेरै अगाडि होइन्, गत वर्ष मात्रै उनको टेस्ट जीवनलाई लिएर अनेक प्रश्न उठेका थिए ।  अष्ट्रेलियाविरुद्धको ऐसज सिरिजमा उनले चार खेलमा १ सय ७ रन बनाए । नतिजा, उनी वेस्ट इन्डिज भ्रमणमा निस्केको इंग्ल्यान्ड टिमबाट बाहिर फ्यालिए । उनी ट्वान्टी ट्वान्टी क्रिकेटका भने निकै मज्जाका खेलाडी हुन्, यसमा भने कुनै शंका छैन् । अहिलको प्रदर्शनले देखाएको छ, उनी सीमित ओभरको खेलका ‘जोस’ नै हुन् ।

इंग्ल्यान्डका पूर्व कप्तान माइकल भनले हालै ट्विट गर्दै लेखेका छन्, ‘जसरी बटलरले अहिले ब्याटिङ गरिरहेका छन्, त्यसको छेउछाउ त अहिले कोही पनि छैनन्, वास्तवमै उत्कृष्ट छन्, उनी ।’ सन् २०११ मा उनले इंग्ल्यान्डका लागि ट्वान्टी ट्वान्टी क्रिकेटमा डेब्यु गरेका थिए । म्यानचेसटरमा भएको त्यो खेल भारतविरुद्ध नै थियो । सन् २०१९ मा इंग्ल्यान्डले वान डे विश्वकप जित्दा बटलर टिमका प्रमुख सदस्य थिए ।

उनले वान डे क्रिकेटमा नौ शतक पनि प्रहार गरिसके । तर पनि उनले ट्वान्टी ट्वान्टी क्रिकेटमा इंग्ल्यान्डका लागि धेर गर्न सकेका थिएनन् । तर अहिले उनी राजस्थान रोयल्सका लागि वास्तवमै उत्कृष्ट प्रदर्शन गरिहेका छन् । गत वर्षको ट्वान्टी ट्वान्टी विश्वकपमा उनले खालि श्रीलंकाविरुद्ध मात्र शतक बनाए । तर देश र आफ्नो अलगै टिमका लागि एक खेलाडीको प्रदर्शनमा धेरै फरक हुने रहेछ ।

जस्तो, कोहलीले अहिलेसम्म आईपीएलमा पाँच शतक बनाइसके, तर भारतका लागि भने कुनै शतक बनाउन सकेका छैनन् । बटलर इंग्ल्यान्डमा ल्यान्कसायरका लागि विकेट किपिङ पनि गर्छन् । तर अहिले राजस्थान रोयल्सका लागि यो विशेषज्ञ भूमिका पनि छैनन्, तर उनको महत्त्व बुझेर नै होला, यो फ्रान्चाइज टिमले उनलाई १३ लाख डलर तिरेको छ । त्यसलाई न्याय गर्दै उनले यसपल्ट बनाएका छन्, ३५, १००, ७०, १३, ५४, १०३ र ११६ रन ।

त्यसमा ३२ छक्का र ४१ चौका सामेल छ । राजस्थान रोयल्सका निर्देशक र प्रमुख प्रशिक्षक हुन्, कुमार संगकरा । उनी भन्छन्, ‘बटलरको सबैभन्दा ठूलो विशेषता भनेकै उनी खेललाई निकै नजिकबाट बुझ्न सक्छन्, त्यसै अनुसारलाई आफूलाई प्रस्तुत गर्छन् । को बलरविरुद्ध कति बेला रन बनाउनु पर्छ, उनलाई राम्रोसँग थाहा छ । एउटा टिमले कोही खेलाडीबाट यो भन्दा ठूलो के नै अपेक्षा गर्ने हो र ?’

–एएफपीको सहयोगमा ।